Wa Sarabyin: Kap Bra Ana Tsin-yam Hkrum Ndai Ladaw Gaw Ninghtan Rap Ra Lam Hpe Gaw Sharawt Na Aten Rai Nga Ai Nga Nna, Tsun Dat Nga Ai Shiga

January 29, bat kru ya shani, Italian Leather Chemists Association hte hkrum shaga ai shaloi, shanhte leather htuk shapraw ai ningtawng ai magam bungli hte makau grupyin hpe dingbai dingna jaw ai hkra machyi lam ni hpe shayawm lu ai daram shayawm kau lu hkra galaw na matu n-gun jaw da ai.
Ya na zawn kap bra ana zingli hkrum aten hta bungli galaw ai atsam hte ninghtan rap ra lam hpe rau gaw sharawt sa wa na matu mung hpaji jaw shadum da ai.
Hpungtang hpaji hte jak hpaji ladat ni hte seng ai hpe grau kaja ai hku jai lang lu hkra galaw shapraw nna, masha ni myit lawm ai, htinglai masa hte re ai arung arai ni hpe gying shalat na matu mung n-gun jaw da ai.
Ya na kap bra ana tsin-yam hkrum aten hta mungkan shara shagu, magam bungli galaw sha ai lakung lakyin shagu hta mayak jam jau lam law law hkrum sha nga ai rai nna, dai hpe shatsawm jahtuk sa wa lu na matu Nawku Hpung gaw ahkyak la shang lawm nga ai re ngu mung Wa Sarabyin Frnacis tsun dan wa ai.
San Yawsep a prat hta kan bau magam bungli galaw ten yak hkak jam jau lam ni hpe tawt lai lu ai kasi hpe tsun dan let marai hkum shagu mung tinang kung kyang ai lam hta magam bungli galaw sha ten San Yawsep a kasi hpe la nna yak hkak jam jau lam ni hpe tawt lai lu hkra shakut mu ngu n-gun jaw da ai.
Anhte yawng hte seng ai mungkan dum nta hpe gaw gap ai hta, shatsawm ai hta, tinang kan bau magam bungli galaw sha ai shagu hta sadi sahka let makau grupyin hpe n jahten ai bungli ni hta kang ka galaw sa wa na matu mung n-gun jaw da ai.
Associations wuhpung wuhpawng hpaw nna bungli galaw ai gaw machye machyang ni, mahkrum madup ni, tara lam ni, hpaji ladat ni hpe hpawng chyawm da ai rai nga ai; lawan ladan rawt jat galu kaba wa na matu mung rai nga ai; rau sha ninghtan rap ra ai hte tinang hta ang ai lit magam ni hpe kang ka gun hpai sa wa ga, ngu hpang jahtum mungga hku Wa Sarabyin Francis shanhte hpe n-gun jaw da ai.
By Fr. Patrick Gawmaw Hkawng Yae
#vaticannews
#rvakachinservice
https://www.vaticannews.va/en/pope/news/2022-01/pope-francis-italian-lea...