Wa Sarabyin Francis a hkrun lam a matu Estonia mungdan hpung masha ni lu sha gam akyu hpyi ai lam galaw nga

Baltic Mungdan ni rai nga ai, Lithuania, Latvia hte Estonia Mungdan ni de, ya n-dai September 22 kaw nna 25 ya du hkra Wa Sarabyin Francis sa du gawan na rai nga ai the, Estonia Mungdan de gaw Sept 25 ya shani du sa wa na rai nga ai. 

Shanhte a Mungdan mare daju Tallin de Wa Sarabyin Francis du gawan sa wa na, shata mi pyi aten nna sai rai nga ai majaw, wa sarabyin a hkrun lam a matu hkyen lajang ai hku nna, Estonia Mungdan Kahtawlik Hpung masha ni, lai wa sai September praw 1 ya shani hta lak san lu sha gam akyu hpyi ai lam ni galaw lai wa ma ai rai nga ai. Estonia Mungdan a Saradaw Philippe Jourdan kaw nna woi awn ladat shaw ai npu hta ya na zawn hpung masha ni Wa Sarabyin a hkrun lam a matu lajang nga ma ai lam rai nga ai.

Estonia Mungdan mung chying sha yawng wan 1.3 daram rai nga ai hta, Kahtawlik hpung masha jahpan gaw 7,000 jan daram sha rai nga ai. Lutheran the Orthodox hpung ni mung nga ma ai raitim, Mungdan a mung chying sha yawng a tsa htam shadang 75 daram gaw hpa makam masham mung nnga ai ni rai ma ai. Ndai Baltic Mungdan ni de lai wa sai 1993 ning September shata hta Wa Sarabyin Yawhan Pawlu II sa du gawn lai wa yu sai majaw, ya ndai lang Wa Sarabyin Francis a hkrun lam gaw, Wa Sarabyin Yawhan Pawlu II sa du gawan lai wa ai shaning 25 hpring ai aten hkrak rai nga ai zawn, Baltic Mungdan ni de lahkawng lang ngu na Wa Sarabyin ni sa du ai hkrun lam mung rai wa na rai nga ai.

Wa Sarabyin Francis a Baltic Mungdan ni de du gawan ai hkrun lam gaw September 22 kaw nna 25 du hkra rai na rai nga ai, Sept 22 kaw nna 23 du hkra Lithuania, September 24 ya shani Latvia Mungdan, bai Sept 25 ya shani gaw Estonia Mungdan de du gawan na rai nga ai, nga nna Vatican shiga dap kaw nna shana dat nga ai. 

Source : Vatican News