Wa Sarabyin Francis gaw July 25 ya shani, No. (1) lang na Mungkan Kaji Kawoi ni a poi nhtoi a matu mungga ndau dat ai Shiga

June 22, bat lahkawng ya shani, Wa Sarabyin Francis, du na July shata a mali ngu na laban, July 25 ya shani, No. (1) lang na Mungkan Kaji Kawoi ni a poi nhtoi a matu mungga ndau da nga ai.

Ga baw ginlam, ga manoi hpe Mt 28:20 kaw na “Lamu ga prat htum hkra Ngai nanhte hte rau dinggrin anga nga na nngai law” ngu ai Madu Yesu a ga sadi hpe shaw lang da ai.

Ndai Yesu Madu a ga sadi ga gaw Shi sumsing lamu de lung wa na shawng kaw kasa ni hpe tsun da ai ga sadi ga rai nga ai.

“Nawku Hpung ting gaw nanhte hte ni htep ai hku nga nga ai, anhte hte mung nga nga ai, nanhte anhte hpe yu lakawn nga ai, tsawra nga ai, nanhte kaw na pru mat nna nanhte hpe sha shingtai tawn da na n re ai,” ngu Wa Sarabyin sak kung kaji kawoi ni hpe n-gun jaw da ai.

Covid-19 Chyam bra ana kanu gaw masha yawng kaw kap chye nga ai, grau nna, sak kung sai masha ni kaw grau nna kap lawan ai hte hkam jan n-gun kya ma ai; raitim, Karai Kasang gaw shingtai hkam sha ai shanhte hpe ni htep ai hku galoi mung yu lakawn nga ai, ngu mung Wa Sarabyin masam maram shadum da nga ai.

Karai Kasang Shi a mungga hku Madu a Lamu Kasa ni hpe shangun dat nga ai. Nsin kaba dik htum hta raitim Karai Kasang gaw Shi a lamu kasa ni hpe shangun dat nna anhte a shingtai hkam sham lam hpe shalan shabran ya nga ai; Karai Kasang gaw anhte hte galoi mung arau rai nga ai hpe shadum ya nga ai, ngu mung Wa Sarabyin tsun n-gun jaw da ai.

Sak kung kaji kawoi ni Kabu Gara Shiga Chyum laika hpe hti sumru na matu Wa Sarabyin n-gun jaw da ai. Chyum laika gaw Karai Kasang anhte daini na prat hta shaga nga ai hpe chye na hkawn hkrang hkap la shangun na matu lam matsun rai nga ai, ngu n-gun jaw da ai.

Kadai raitim, shingtai hkrai hkye hkrang la hkrum na n rai ga ai, anhte gaw langai hte langai shamyat shanat nga ra ga ai, hpa majaw nga yang anhte ni yawng gaw Karai Kasang a kashu kasha hpu nau ni hkrai rai ga ai, anhte gaw sai rum naw na myit hte shawng lam mungkan hpe rau gaw de sa wa ra ga ai, tinang hte seng ai magam ni hpe galaw let shada pawn ba madi shadaw garum hkat nga ga, ngu Wa Sarabyin sang lang n-gun matut jaw da ai.

Yupmang shingran mung tawn, lai sai prat mabyin ni hpe mung myit sumru let akyu hpyi nga ra ga ai. Myihtoi Yoela (Joel) 3:1 hta “Dai Madu gaw, dai aten hta, ngai gaw Yuda hte Yerusalem a ngamu ngamai lam hpe bai jaw na nngai, ngu ka da ai gaw, prat galu sai Yuda mare hte Yerusalem mare hpe zawn Karai Kasang gaw asak kung kaji kawoi ni hta myit mada lam yup mang shingran jaw ya na, dai gaw sak naw ram ai ni hta jaw ya na shingran ni rai nga ai ngu Wa Sarabyin sang lang n-gun jaw da ai.

Sak kung kaji kawoi ni a yupmang shingrai rai nga ai, tara rapra lam, simsa lam, kahkying gumdin lam ni hpe sak naw ram ai ni hta myit mada shara tai wa na rai nga ai. Shanhte hte rau shawng lam myit mada shara nga ai mungkan hpe rau gaw de sa wa ga ngu mung saw shaga da ai.

Dai yupmang shingran hpe lai sai prat na mahkrum madup, mabyin masa lam ni hpe bai htang sumru let gaw de sa wa ra ai. Lai sai ten ni hta majan a majaw myit machyi na zawn re ai lam ni hpe mung sumru lu na ga ai. Raitim dai lam ni gaw ya na sak ram ai ni sharin hkam la, shading sharai sa wa lu na matu dai prat hpe hkrum sha lai wa ai ni e mahkrum madup hku tsun dan jahpra dan lu nga ai. Dai hku galaw ai a marang e, simsa lam a manu namchyim hpe sharin hkam la lu na ma ai hte grau chye na hkam sha lu na ma ai.

Hpang jahtum hku nna akyu hpyi ai lam hte seng nna Wa Sarabyin Benedict XVI a ga, “sak kung kaji kawoi ni a akyu hpyi ga gaw mungkan ga hpe makawp maga lu ai, garum ya lu ai, dai gaw kaga ni hta grau nna akyu jaw lu ai akyu hpyi ga ni rai nga ai, ngu ai sakse hkam ai hpe bai tsun shadum ya ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-francis-world-day-grandparents-elderly-message.html