Wa Sarabyin: Du Sa Ladaw Hta, Madu Yesu Hte Hpu Nau Ni A Matu Anhte Hpa Galaw Ging Ai Hpe Karai Kasang Kaw San La Ga

December 12, laban shani, San Peter Shawa Pa hta, Madu A Lamu Kasa Akyu Hpyi Ga tsun ten, “anhte a sak hkrung lam hta, du na Hkristmas a matu gara hku shajing da ra ai lam, Yesu Madu hte hpu nau ni hpe gara hku daw jau ra ai lam ni anhte hkum hpe anhte san dinglik nga ga, ngu Wa Sarabyin Francis hpaji jaw hpyi shawn da ai.

Ndai Du Sa Ladaw (3) ngu na laban hta gaw buhkawm akyu hpyi sa ai ni law law San Peter shawa pa hta du hpawng ang ai re lam chye lu ai (Pope Francis greeted the many pilgrims present). Dai shani hta sasana ma ni hpe woi sa ai kun dinghku masha ni, shangai ai shaloi na ma chyangai Yesu a sumla hpe la sa nna shaman hkam la ma ai lam chye lu ai. Dai zawn shaman hkam la ai laban hpe Wa Sarabyin, San Pawlu VI ngu na wa lai wa sai manga shi (50) daram aten kaw nna hpang woi lai wa sai rai nna, dai laban hpe “Bambinelli Sunday” ngu shamying shaga ma ai rai nga ai. Dai zawn shaman hkam la ngut nna Ma Yesu shangai wa sai namchyim hte rau tinang a buga dum nta de bai nhtang wa ai hkam sha lam langai rai nga ai, nga nna Vatican Shiga Dap kaw nna ndau da ma ai.

Wa Sarabyin Francis gaw December 12 ya shani poi nhtoi ang ai “Our Lady of Guadalupe” a lam mung tsun shalawm shadum jahprang da ai. (70) lang ngu na ladu hkrum ai “Caritas Internationlis” nhtoi masat dingsat mung ang ai majaw dai hpawng de ai hta lawm ai ni hte mung, Wa Sarabyin Francis, hkrum shaga lam galaw lai wa ai.

Anhte ni Hpa Galaw Ra Na Ga Ta?

Madu Karai a shaman chyeju hkam la sai ni anhte gaw tinang a sak prat hta kaja grau ai hku sak hkrung sa wa ra ga ai. Kabu aw law let hkinnum nga lu na matu anhte a prat mahkrum madup hta kaja grau ai de galai shai nga ra ai. Anhte a prat hkrunlam hta gara hku sak hkrung nga sa ra ai hpe aten shagu sumru let ta tut magam hta mung dai kaja grau ai sak prat hte sak hkrung sa wa ra ai, ngu Wa Sarabyin n-gun jaw da ai.

Anhte marai hkum shagu gaw tinang a sasana magam hpe jahkrum shatup ra ai

Sak hkrung nga ai anhte marai hkum shagu hta magam lit ngu ai nga ai. Galai shai ra ai hpe n mai yat da ai, n mai ngam da ai. Dai galai shai lam ni gaw Karai Kasang jaw ya ai chyeju kum hpa rai nga ai. Shi gaw anhte hkum hpe anhte tam la lu na matu hpyi shawn taw nga ai. Dai gaw anhte a yupmang shingran ni anhte a prat hta teng sha byin pru wa na matu shakut shaja ai rai nga ai.

Anhte a sasana magam lit hpe jahkum shatup na matu Karai Kasang kaw ndai ga san san na n mai hkrit, agam n mai ga ai. “Anhte ni Karai Kasang a matu hpa galaw ra na rai?” “Anhte hkum nan hte anhte a hpu nau ni a matu hpa galaw ra na rai?” “Nawku Hpung hte wuhpung wuhpawng a matu anhte hpa galaw ra na rai?”

Ndai Du Sa Ladaw hta gaw hkring la nna nan Hkristmas a matu hpa ni shajing da ra na rai, Yesu Madu hte hpu nau ni a matu hpa galaw ra na rai, ngu anhte hkum hpe anhte san sumru la ra ai.

Makam gaw tatut hkrang shapraw ai hpe shabyin ya ai.

Tatut magam hta makam ngu ai nga nga ai. Anhte hpa galaw ra na ga ta, ngu Yawhan Baptista hpe san ai shaloi, masha wuhpung shagu hpe shanhte a prat masa hta hkan nna mahtai jaw ya ai.  Ndai gaw manu dan dik sharin shaga ai lam rai nga ai. “Makam gaw masha shingtai shagu a prat hta du shang wa nna manu dan wa shangun ai,ngu Wa Sarabyin sharin shaga da ai.

Hpang jahtum ginchyum dat mungga hta, masha hkum shagu tinang galaw lu ai magam kaji kaba hpe atsawm hkrak rai sumru la let Hkristmas a matu shajin shachyip sa wa ra ai lam, dai zawn galaw ai gaw asak kung dinggai dingla ni hte machyi makaw, jam jau jam hkau, matsan mayan re ai ni, shing n rai, langai ngai a ra kadawn ai hpe  garum shingtau ya ai tai nga na re lam, dai gaw shut hpyit mara, wa ra ai hka, sharai jahtuk la ra ai chye na shut ai lam ni a matu mara dat hkyam sa ya na akyu hpyi shaja ai mung rai nga ai, ngu tsun shang lang dan let, “Chyoi Pra Ai Nu Maria Anhte hpe garum shingtau akyu hpyi htinglu htinglai ya u ga law” ngu akyu hpyi, hpumding dat shangut da ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-12/pope-during-advent-ask-what-we-should-do-for-jesus-and-others.html