Wa Sarabyin Du Gawan Sa Wa Na Lam Hpe Thai Mungdan Kaw N-na Myit Mada Lam Kaba Hte Kabu Gara Nga Ai Shiga

 

Ndai Nov shata 20 kaw nna 23 du hkra Thai mungdan de Wa sarabyin Francis du gawan sa wa na rai nga ai majaw myit mada lam kaba the Thai mungdan kabu gara nga ai, nga nna Thai mungdan hta sasana galaw nga ai Italy myu sha Jau Rafaelle Sandonà Vatican shiga dap de tsun shana lam gaalw dat nga ai.

Lai wa sai 1984 ning hta Wa sarabyin Yawhan Pawlu II mung Thai mungdan de du gawan lai wa yu sai majaw, ndai lang na Wa Sarabyin Francis a hkrun lam gaw shaning 35 ning na ai hpang lahkawng lang ngu na Thai mungdan de wa sarabyin du gawan sa ai hkrun lam rai na rai nga ai. Bai ndai hkrun lam gaw Wa Sarabyin Francis a 4 lang ngu na Asia dan de du gawan ai hkrun lam, 32 lang ngu na maigan mungdan ni de du gawan sa ai hkrun lam mung tai wa na rai nga ai.

Thai mungdan de du gawan sa wa na Wa sarabyin a hkrun lam hte seng nna Thai mungdan hta sasana galaw nga ai Jau Rafaelle Sandonà tsun ai hta, “Wa sarabyin du gawan sa ai a marang e hpung masha ni a makam masham hpe shangang shakang n gun ban ya ai lam tai na, Buddha makam masham hpe malawng maga hkap la kam sham ai mungdan rai nga ai majaw hpu nau Buddha ni hte hku hkau kanawn mazum lam hpe n gun ban ai lam tai na re, Wa sarabyin Yawhan Pawlu II sa du gawan lai wa ai hpang shaning 35 ning na ai hpang she Wa sarabyin bai du gawan sa wa na lam rai nga ai majaw myit mada lam kaba hte Thai mungdan kabu gara nga ai. Myit hkrum gahkyin gumdin lam hpe n gun dat shakut nga ai Sarabyin re ngu ai lam hpe yawng chye nga ma ai majaw Wa sarabyin Francis a hkrun lam hpe Thai mungdan kaw nna grai myit mada kaba tawn da let kabu gara nga ma ai rai nga ai. Kahtawlik hpung masha ni nlaw nla kachyi sha shanu nga ai mungdan rai nga ai majaw Wa sarabyin a du gawan lam gaw hpung masha ni a matu grai nan ahkyka ai lamang kaba rai nga ai” nga nna  Jau Sandonà Vatican shiga dap de tsun shana lam galaw dat nga ai.

 

Thai mungdan mungchying sha ni yawng wan 68 daram nga ai hta na tsa htam shadang 90 jan gaw Buddha ni rai ma ai, Muslim ni mung tsa htam shadang 4 daram nga ma ai, Hkristian ni gaw yawng rai yang tsa htam shadang 1 daram sha re, de a ka-ang hkup daram sha Kahtawlik hpung shani rai nga ma ai majaw nlaw la ai nawku hpung kaji rai nga ai.

Nov 20 kaw nna 23 du hkra Thai mungdan hta Wa sarabyin shanu nga na rai nna, Nov 23 ya shani Japan mungdan de Wa sarabyin matut hkawm sa na, Nov 26 ya shani Roma de Wa sarabyin bai ginhtang wa na rai nga ai, nga nna Vatican shiga dap kaw nna shana dat nga ai.

https://www.vaticannews.va/en/pope/news/2019-11/pope-francis-apostolic-visit-thailand-interview-sandona.html

       

 

Add new comment

12 + 2 =

Please wait while the page is loading

Wa Sarabyin Du Gawan Sa Wa Na Lam Hpe Thai Mungdan Kaw N-na Myit Mada Lam Kaba Hte Kabu Gara Nga Ai Shiga | Radio Veritas Asia

Error

The website encountered an unexpected error. Please try again later.