Wa Sarabyin: Deacon Ni Gaw Nawku Hpung Kata Daw Jau Makawp Maga Ai Ni Rai Ma Ai Nga Tsun Ai

Wa Sarabyin: Deacon Ni Gaw Nawku Hpung Kata Daw Jau Makawp Maga Ai Ni Rai Ma Ai

  Wa Sarabyin Francis, June 19, bat kru ya shani, prat tup apnawng daw jau ai Roma Saradaw Ginwang na Deacon ni hte rau masha 500 hte hkrum shaga ai shaloi prat tup Deacon ni a lit magam ni hte seng nna tsun dan da ai. Prat tup apnawng Deacon ni gaw shawng lam hpe n tam ai sha, Kabu Gara Shiga sama ni hte rau shanhte a prat hpe ap nawng da ma ai gaw Karai Kasang a shagrit shanem ai hpe ndau ya ai hte maren sha rai nga ai.

  Kahtawlik Nawku Hpung hta Deacon Aya hkam ai ni gaw Saradaw, Jau Ni a wuhpung hta lawm sai rai nga ai. Deacon Aya hkam la ai ni “Cleric” mying ai Jau wuhpung hta lawm sai hpe Vat II zuphpawng hta, the Latin-rite hkan nang ai Kahtawlik Nawku Hpung kawn masat let hkap la sai rai nga ai.

  Kahtawlik Nawku Hpung hta Jau aya hkam la na matu Deacon Aya hkam la ai ni mung nga ai zawn, Jau Aya n hkam la ai sha prat tup Deacon prat hku ap nawng ai Deacon ni mung nga ai. Prat tup Deacon Aya hkam la ai Deacon ni gaw num n la shi ai ni mung, hkungran ta matut sai ni mung mai tai nga ai. Raitim, num la yu sai wa Deacon Aya hkam la jang dai shi a ningrum ningtau hte rau n mai nga sai. Deacon Aya hkam la ai hpang mung n mai hkrungran sai.

  Deacon Aya hkam ai ngu ai gaw Jau tai na matu ngu ai hta, daw jau na matu madung rai nga ai (Lumen Gentium). Shaga la hkrum ai ngu ai gaw shagrit shanem na matu rai nga ai; Madu Yesu hkum nan shagrit shanem ai wa rai nga ai; Shi hkum shi kaji htum ai wa shatai la nna yawng a shangun ma tai ai wa rai nga ai. Anhte dum ra ai gaw Madu Yesu a sape ni tsaw ra na ngu ai gaw daw jau na hpe tsun ai; daw jau na ngu ai gaw ru reng na ngu ai hpe tsun ai. Arawng power gaw daw jau ai hta nga nga ai; kaga gara kau mung n nga ai; deacon ni gaw nawku hpung kata daw jau makawp maga ai ni rai ma ai majaw shanhte hta dai arawng power nga nga ai, ngu Wa Sarabyin Francis shang lang shadum n-gun jaw da ai.

Alu Atan Hte Up Hkang Lam

  Jau prat hte daw jau na matu shaga la hkrum ai masha yawm wa ai raitim, Deacon prat hte daw jau ai masha ni hpe shaga la ai lam nga nga ai majaw madi shadaw lam kaba lu la nga ai. Vatican Ninghpum Salang (Vatican Council) ni sumru bawngban myit mang tawn ai hta, moi shawng na Hkristan ni zawn sha, Deacon ni gaw alu atan lam, garum shingtau lam, up hkang lam ni hte seng ai rung mahkrun lam ni hta mung ap nawng ai ni rai nga ai, ngu myit la da ma ai, ngu mung Wa Sarabyin Francis tsun sang lang da nga ai.

Jau prat daw mi hte n rai ma ai

  “Deacon” ngu ai ga si gaw “diakonia” ngu ai Greek ga si kaw na yu hkrat wa ai rai nna, “service” “daw jau ai” ngu lachyum rawng nga ai. Dai majaw Deacon ni gaw shanhte galaw ra ai lit magam lam ni hpe galoi n shamat, n hprai ai sha galaw ra ma ai; Jau prat daw chyan hte daw jau ai ni mung n rai ma ai; Misa tawn hta tara tau ai ni sha mung n rai ma ai; shanhte gaw daw jau ai lit magam hpe htep lahti gun hpai ai ni, kadai hpe mung ngam da ai lam n nga ai sha yawng hpe daw jau ai ni rai ma ai; Karai kasang a tsawra ai hpe mungkan masha yawng a prat hta jahkra ya ai laklai daw jau masha ni rai ma ai; dai majaw deacon ni gaw myit masin salum hta nan jin jin rai nga ma ai zawn, sat lawat lailen hte mung daw jau na jin jin rai nga ma ai, ngu mung Wa Sarabyin Francis matut sang lang da ya nga ai.

  Deacon langai hpra kaw nna myit mada lam masum hpe Wa Sarabyin Francis tsun hpaw dan da ai hta, (1) “shanhte gaw shagrit shanem ai ni rai nga mu ga, (2) kaja ai ningrum ningtau, kaja ai kawa, kaja ai kachyum ni zawn rai nna dinghku num hte dinghku la hku kanawm mazum ai ni a mayak mahkak lam ni hta shanhte a lata ladawn ya let myit mada lam jaw, garum shingtau shalan shabran ya ai ni rai nga mu ga, (3) shanhte gaw Karai Kasang hte tsan mat ai ni, nawku hpung hte tsan mat ai ni, bai matsan jam jau ai ni hpe mung, Hkristan Nawku Hpung wuhpawng hpe mung, aten shagu “sin langa” ai ni rai nga mu ga; dai gaw Madu Yesu, Deacon ni a marang e matsan mayan re ai ni hte lam dam mat ai anhte a masin salum chyinghka hpe sa akawk taw ai rai u ga matu rai nga ai, ngu Wa Sarabyin Francis hpang jahtum sang lang n-gun jaw da nga ai.

Source; Vatican News

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice