Wa Sarabyin: Catholic Media Hte Seng Ai Magam Gun Ni Teng Man Mabyin Ni Hpe Hkan Shagu Masha Hpe Mung Hkungga Ga

January 28, bat manga ya shani, “Mungdan Shagu Kahtawlik Shiga Dap Magam Gun Ni” (International Catholic Media Consortium) hte hkrum shaga ai shaloi, shiga la ai ni teng man byin ai lam hpe hkan nna ndau ya lu na matu shakut na hte masha hkum shagu hpe mung hkungga manu shadan ga, ngu n-gun jaw da ai.

Dai shani shanhte hte hkrum shaga ai hta, shinggyim matut mahkai lam hte teng man lam a ga baw ginlam hpe sumru woi da ai.

Consortium hpe Aleteia hte I Media kawn lit la galaw nga ai rai nga ai. Kahtawlik Nawku Hpung kawn 2021 shaning ningnan daw maga hta hpaw hpang da ai, teng man byin ai lam hpe sawk sagawn ai “Catholic FactChecking” mying hte re ai website re lam chye lu ai.

N teng, n jaw ai, masu ai, sawt ai hku tsun ai lam ni hte mabyin lam ni hpe tam sagawn ndau ai shabra ai shiga dap, wuhpung ni a pandung gaw shut ai pandung rai nga ai, ngu Wa Sarabyin Francis shadum jahprang da ai.

Daini na prat ni hta gaw masha law law wa, ndai dam lada kaba la ai media lam hpe jai lang nga ma ai re majaw, media hte seng ai magam gun ni gaw teng man jaw ang ai ladat kaja ni hpe jai na gaw grai ahkyak ai ngu Wa Sarabyin tsun shadum da ai.

Shinggyim matut mahkai ai ni gaw teng byin ai ai lam ni hpe sadi maja let hka ja ra ai; n shut n shai, tup hkrak jaw ai lam ni hpe sagawn nna jep yu ra ai; shanhte ndau shana na dai shiga gaw shanhte hkum nan tam mu sawk sagawn da ai, teng ai, jaw ai hpe akyu pru, akyu tai na yaw shada lam nga ai rai ra ai. Shanhte a lit kaba gaw tam mu sawk sagawn da lu ai teng ai shiga hpe hkrak jaw ai hku ndau ya ai hta dai hpe madi shadaw ai sang lang matsing hpa hpe mung jaw ra ai. (Pope St. Paul VI’s 1972 message for World Communications Day)

Teng man ai shiga hpe jaw lu na matu teng man lam a matu rau jawm shakut ra ga ai, ngu mung Wa Sarabyin sumru woi da ai.

Wuhpung wuhpawng a magam hpe jep joi ai lam galaw ai hta teng man ai hku jep joi nna, tingkyeng akyu matu n tam na hte tingkyeng sut masa amyat akyu matu hkum tam na matu sadi jaw da ai.

A jet n re ai, shut ai, masu ai shiga shadam ni hpe teng man lam hte bai jahtuk sharai shatsawm ra ai; Hkristan masha ni a matu “teng man” jaw ang ai lam gaw jeyang ai lam hta grau ai; teng man lam gaw prat ting hte seng ai, ngu Wa Sarabyin Francis shadum jahprang da ai.

Teng man ai hta dau jau nna, jaw ang ai hte kaja ai hku hkau kahnawn mazum matut mahkai nga ra ai; dai gaw yawng a akyu ara matu rai nna, shingtai a matu n re ai, karan ginhka na matu mung n rai, ning hkap ai ni hpe karan ginhka kau ai mung n mai rai ai, ngu hpang jahtum Wa Sarabyin Francis shadum jahprang da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-01/pope-francis-catholic-media-consortium-fact-checking.html