Wa Sarabyin: Asuya Ningbaw Ningla Ni Mung Shawa Masha Ni Hten Run Na Hpe Chyeju Hte Hkum Galaw Mu

June 5, Chyoi Pra Ai Wenyi yu hkrat wa ai laban shani, Wa Sarabyin Francis gaw mung shawa masha ni hten run mat na hpe hkum galaw mu, ngu Mungdan Asuya Ningbaw Ningla ni hpe sadi jaw da nga ai.

Ukraine mungdan hpe Russia Asuya ni gasat ai nhtoi latsa (100) hpring lai wa sai rai nna, Hkristan masha ni yawng pu ba ai lam n nga ai sha, matut manoi akyu hpyi ya nga na matu mung saw shaga da nga ai.

Mungdan Asuya ningbaw ningla ni hpe mung, “Chyeju hte mung shawa masha ni hpe hkum jahten mu, hkum zingri mu”, ngu Wa Sarabyin Francis shadum sadi jaw da nga ai.

Paska ladaw nhtoi (50) ya hpring ai hpang Chyoi Pra Ai Wenyi yu hkrat wa ai shani hta ga kaga ga shaga ai myusha bawsang ni shada chye na hkat nga na matu Wa Sarabyin matut shadum da ai.

Shinggyim prat hpe manu shadan hkungga nga ra ai lam mung tsun shadum let simsa lam a matu n hkring n sa matut manoi akyu hpyi nga na matu kahtap hpyi shawn da nga ai.

By Fr. Patrick Gawmaw Hkawng Yae

#vaticannews

#rvakachinservice

#pentecostday

05 June 2022, 12:42

https://www.vaticannews.va/en/pope/news/2022-06/pope-appeal-ukraine-russia-war-regina-coeli-pentecost.html