Wa Sarabyin: (2) Lang Ngu Na Kaji Kawoi Ni A Nhtoi Masat Dingsat A Matu Ga Manoi Ga Baw Ginlam Hpe Ndau Da Ai Lam

Wa Sarabyin: (2) Lang Ngu Na Kaji Kawoi Ni A Nhtoi Masat Dingsat A Matu Ga Manoi Ga Baw Ginlam Hpe Ndau Da Ai Lam

 February 15, bat lahkawng ya shani, Wa Sarabyin Francis, (2) lang ngu na kaji kawoi ni hte asak kung dinggai dingla ni a masat dingsat (World Day of Grandparents and Elderly) nhtoi hte seng nna ga baw ginlam ga manoi hpe ndau da ya ai.

  “In old age they will still bear fruit” (Shk.Kd 92:15). “Ngai, Ndai ga manoi hpe lata ai gaw (2) lang ngu na mungkan kaji kawoi ni hte asak kung dinggai dingla ni a masat dingsat nhtoi a matu rai nngai; 2022 July 24 ya shani galaw na World day of Grandparents and Elderly a matu rai nngai; dai gaw prat bang shagu na masha ni lapran, grau nna kaji kawoi ni hte shu mashi shu masha ni lapran hkrum shaga tsun shaga jahta lu na matu yaw shada ai rai nngai” ngu Wa Sarabyin sang lang da ai.

  Asak kung gumgai dingla ni hte kaji kawoi ni a masat dingsat nhtoi, “World Day of Grandparents and the elderly”, hpe 2021 shaning Wa Sarabyin Francis masat hpang lai wa ai rai nga ai. Lai wa sai shaning, ndai masat dingsat nhtoi hpe ndau ai laban shani, Missa Hkungga nawng jau let Kabu Gara Shiga Chyum daw hta lawm ai mabyin masum: (1) Yesu Madu gaw kaw si hpang gara ai ni hpe mu ai; (2) Madu Yesu lusha muk hpe garan ya ai; (3) Madu Yesu shawa masha ni sha ngam ai ahkyep alep ni hpe hta shinggyim mahkawng na matu sape ni hpe matsun ai; ndai lam ni hpe sang lang let ndau da ai rai nga ai.

  Yu nna mu la mu, mu la ai hte maren garan kachyan mu, dai hpe matut galaw mu, ngu ai sharin shaga ga hte mungkan kaji kawoi ni hte asak kung dinggai dingla ni a poi nhtoi hpe shagring hpaw hpang da ai rai nga ai.

  Kaji kawoi ni hte asak kung dinggai dingla ni gaw shinggyim wuhpung wuhpawng a matu mung, nawku hpung wuhpung wuhpawng a matu mung kumhpa rai nga ai, sari manu mung rai nga ai ngu Wa Sarabyin Francis lata da ai ga baw ga manoi hpe lakap let the Discastery for Laity, Family and Life kaw nna tsun sang lang da ma ai.

  Matut nna mung, mungkan ting na Sardaw Ginwang madang, Jau Ginwang madang, nawku hpung wuhpung wuhpawng ni gaw ndai masat dingsat nhtoi hpe tinang buga masa hta hkan nna yaw shada lam tawn da let htut manu ai hku galaw ga ngu, n-gun jaw da ai.

 Wa Sarabyin hkum nan mung, “asak kung dinggai dingla ni hte kaji kawoi ni a kayu hpyi nsen gaw krang dik rai nga ai; sak ram ramma ni gaw shanhte ni hte ni htep ai hku nga ra ai, Karai Kasang gaw shanhte ni hku nna shaman jaw shaman ya na hte hkye hkrang la na masing nga ai” ngu tsun sang lang da nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice