Vatican Radio Nsen Shapoi Dap Hpaw Hpang Ai Shaning 88 Ning Ladu Hkrum

Italy Mungdan hte Vatican lapran myit hkrum ta masat htu nna Vatican Mungdan ngu byin tai wa ai hpang kaw nna nsen shapoi hpang wa ai Vatican Radio nsen shapoi dap gaw, n-dai February 12 ya shani nsen shapoi hpang ai shaning 88 ning ladu hkrum sai rai nga ai. 

1931 ning February shata 12 ya shani dai shaloi na Wa Sarabyin Pius XI kaw nna Vatican Radio nsen shapoi dap hpe shaman hpaw hpang dat ya ai hte, nam bat langai lang ngu na Radio kaw nna Mungga htawn ai lam hpe mung Wa Sarabyin Pius XI galaw lai wa ai rai nga ai. Italy Mungdan hte Vatican lapran myit hkrum ta masat htu nna Vatican Mungdan ngu byin pru wa ai gaw 1929 ning February 11 ya shani rai nga ai majaw, Vatican Mungdan ngu nna byin pru wa ai hpang 2 ning ladu hkrum ai hpang shani ya na zawn Vatican Radio nsen shapoi dap nsen shapoi hpang dat lu lai wa ai lam rai nga ai.

Vatican Mungdan ngu nna byin pru wa ai hpang 4 ya re ai aten kaw nna Vatican Radio nsen shapoi dap galaw shachyaw hpang na matu Wa Sarabyin Pius XI kaw nna matsun lit shatsam ai lam galaw dat ai. 1931 ning February shata 12 ya shani nam bat langai lang ngu na Vatican radio a nsen shapoi ai lam hpang dat lu ai, raitim mung radio kaw na ga shaga ai madang nre ai sha, tsun shana mayu ai mungga lam ni hpe nsen gayat nna shapoi ai masa re nga ai. Dai shani shawng nnan Vatican radio lit hkam jak sara kaw nna shapoi shapraw dat ai lam gaw Latin ga hku nna In nomine Domini, Amen. “Madu a mying ning sang hta Amen” ngu ai mungga re nga ai. Ndai gaw Radio kaw nna nsen pru hpang sana re ngu ai lam hpe ndau shana dat ai lam rai nga ai. “Ya ndai aten Nawku hpung a ning baw Wa Sarabyin Pius XI kaw nna Vatican Mungdan a nsen shapoi dap Vatican radio kaw nna Mungkan ting hpe simsa lam mungga hte shaman chyeju ni hpe jaw ya na re, nga nna Italalian myu sha ga the shana ngut ai hpang jang Wa Sarabyin Pius XI kaw nna nam bat langai lang ngu na radio Mungga hpe shapoi hpang dat ai re nga ai.

Magam gun ni marai 8 hte sha lit la shapoi hpang hkrat wa ai Radio Vatican nsen shapoi dap a magam bungli ni lani hte lani rawt mden zing hka jat kaba wa ai, amyu ga ni law law hte jat shapoi ai lam ni galaw ai majaw, 1970 ning kaw nna  grau shara htuk manu ai Vatican shinggan maga, Roma mare na Palazzo Pio ngu ai shara hta daju nna nsen shapoi nga ai gaw dai ni du hkra rai nga ai.

Source :Vatican News