Ukraine Mungdan Gumsan Magam, President, Akyu Hpyi Ya Nga Ai Wa Sarabyin Francis Hpe, Phone Hte, Chyeju Dum Ga Tsun

August 12, bat kru ya shani, Ukraine Gumsan Magam Volodymyr Zelensky, Ukrain mung shawa masha ni a matu akyu hpyi ya nga ai Wa Sarabyin Francis hpe phone matut mahkai let chyeju dum ai lam tsun wa ai lam chye lu ai.

Ndai matut mahkai hkrum shaga ai lam a majaw Wa Sarabyin hte Ukraine masha ni matut mahkai rau rai nga ai lam dan leng nga ai.

Wa Sarabyin Francis, Ukraine masha ni a matu akyu hpyi ya nga ai majaw chyeju dum ai lam, Mungdan Gumsan Magam Zelensky hkum nan shi a tweeter kaw mung mara da ai re lam chye lu ai.

"Anhte a mungdan hpe hpyen masa hte gasat nga ai hkrit kajawng hpa mabyin ni hpe mungkan ting ndau ya ai wenyi hpa-awn ni a madi shadaw garum ya lam hpe ra kadawn nga ga ai re", ngu Ukraine mungdan gumsan magam ka da ai.

Ukraine mungdan hte mung shawa masha wuhpung wuhpawng gaw Wa Sarabyin hte hkrum lu na myit mada kabu sharawng nga ga ai re, ngu mung matut ka da ai.

Ukraine mungdan de Wa Sarabyin sa du kawan na hpe ra sharawng ai, ngu tsun ai rai nga ai.

March 22 ya shani, Italy Parliament hte hkrum shaga ai shaloi mung, Zelensky, Wa Sarabyin hte hkrum shaga ai lam, dai shaloi mung, Wa Sarabyin, grai ahkyak ai ga ni tsun ai lam, chye lu ai.

De a shawng, February 26 ya, Russia ni shang gasat hpang ai hpang lahkawng ya ngu na shani mung, hpone hte shaga hkat lai wa ma ai lam chye lu ai.

Dai shaloi, Wa Sarabyin Ukraine mungdan a matu grai myit n pyaw lawm ai lam tsun lai wa ai rai nga ai.

August 10, bat masum ya shani, hpung shawa masha ni hte hkrum shaga ai ten hta, Wa Sarabyin Francis, Ukraine mung shawa masha ni, laja lana re ai majan tsin-yam hkrum sha nga ai ni a matu myit grai hkra machyi, myit n pyaw, myit yawn ai lam tsun shada da ai rai nga ai.

Majan tsin-yam hkrum mungdan htawt sit nga hkawm ai ni matut manoi du shang wa nga ai hpe mu mada nga ai majaw Ukraine majan hpe lawan jahkring, simsa lam tam na matu hpyi shawn da lai wa ai rai nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-ukraine-zelensky-phone-call.html