Uhpung Uhpawng  Kata Hta Byin Nga Ai Lachyen Ginghka Aroi Ara Galaw Lam Ni Hpe, Wa Sarabyin Kaw Nna Tsun Sadi Jaw Lam Galaw

Dai ni na shinggyim uhpung hta byin pru nga ai, yak hkak hkrum nga ai masha ni hpe aroi ara galaw ai masa hpe Wa Sarabyin Francis kaw nna tsun sadi jaw lam galaw dat nga ai. Du wa na September shata 29 ya shani galaw na rai nga ai, 105 lang ngu na Bu htawt tsin yam hkrum masha mungkan masat nhtoi kaba shani a matu ndau shapraw ai Wa Sarabyin a matsun mungga hta lahta na zawn tsun sadi jaw lam galaw dat ai rai nga ai.

Wa Sarabyin a munga hpe, “Dai ma kaji langai mi hpe pyi nanhte n gawn n sawn n di kau myit ga, sadi nga mu: nanhte hpe ngai tsun ma de ga, Sumsing lamu kata e, shanhte a lamu kasa ni gaw, sumsing lamu na nye Wa a myi man hpe, galoi mung a mada nga ma ai” (Mt 18:10) nga ai ja chyum mungga hte hpang da nga ai.

Wa Sarabyin tsun ai hta, “Dai ni na mungkan hta, chye chyoi ai ni chyu sha shara grau lu ai masa hte, lachyen ging hka da hkrum ai yak hkak ai masha ni hpe aroi ara galaw ai masa ni grau grau law jat wa nga ai, mungdan a sut nhprang rai ni hpe, sut su ai masha naku mi a akyu a matu chyu sha shaw jai lang ai, sut masa galaw ai lam hta mung lu sut ai ni grau grau lu su jat wa shangun nna, mastan ai ni hpe grau matsan mat wa shangun ai masa byin nga ai. Sinat laknak ni hpe htuk shapraw nna, kaga mungdan ni de dut shabra ai lam galaw ai, dai shanhte dut shabra dat ai sinat laknak ni a majaw mungdan ni hta kasat gala majan mang hkang ni byin ai, dai majam mang hkang ni a majaw hprawng htawt pru wa ai tsin yam hkrum masha ni hpe bai rai yang gaw dai sinat laknak ni dut shabra lam galaw ai mungdan ni bai nkam hkap la ma ai.

 Ndai lam ni a majaw grau matsan ai ni grau jam jau hkrum sha ra ma ai. Ndai matsan ai masha ni gaw sha ku hta jawm dung sha na ahkaw ahkang nlu, sha ku ntsa kaw na hkrat wa ai ahkyep alep ni hpe sha hta sha lu ai masa byin hkrum nga ma ai. Ndai zawn jam jau hkrum sha nga ai masha ni hpang maga tsap nna nawku hpung gwi gwi tsun tsap shaga ya lawm ra ai, hpa majaw nga yang nawku hpung ngu ai anhte hkum nan mung ndai zawn lachyen ging hka da hkrum ai ni rai nga ga ai majaw rai nga ai” nga nna wa sarabyin tsun dat nga ai lam Vatican shiga dap kaw nna shana dat nga ai.

Source:Vatican News