Syria Mungdan A Matu, Akroi Anoi Lajin Ai Lam, Wa Sarabyim Bai, Kahtap Galaw Dat Ai Shiga

Syria asuya hpyen hpung ni kaw nna majan baw kasat ai lam ni bai galaw nga ai majaw tsin yam jam jau hkrum nga ai Syria mungdan Dingdung-sinpraw maga na mungchying sha ni hpe makawp maga la ya na matu mungkan mungdan ning baw ni hpe akroi anoi lajin ai lam Wa sarabyin Francis bai galaw dat nga ai. Feb 9 ya, laban shani shani ka-ang Angelus akyu hypi woi ngut ai hpang San Peter pa kaba hta du hpawng nga ais shawa hpawng kaba hpe tsun shaga ai mungga hta ya na zawn Wa sarabyin Francis tsun lajin dat ai lam rai nga ai.

Wa sarabyin tsun ai hta, “Syria mungdan Dingdung-sinpraw maga daw hta, Asuaya hpyen hpung ni kaw nna majan baw kasat ai lam ni bai galaw galaw nga ai majaw mungchying sha ni law law mare kahtawng ni kaw nna hprawng pru wa ra nga ma ai hte, Num ma ni, ma kaji ni tsin yam jam jau hkrum nga ma ai lam myit machyi hpa shiga ni hpe matut manoi na lu nga ai. kasat gala lam ni hpe jahkring kau lu na matu hte Mungchying sha ni a asak hpe manu shadan ya na matu mang hkang hta shang lawm nga ai uhpung ni yawng hku nna mung, mungkan mungdan ningbaw ni hku nna mung jahikrum bawngban ai lam ni, matut mahkai tsun shaga lam ni galaw nna mahtai tam ran hparan la a lam ni galaw ga,” nga nna akroi anoi tsun lajin lam galaw let jam jau hkrum nga ai Syira mungdan a matu Wa sarabyin akyu hpyi ya dat nga ai.

Rawt malan uhpung ni zing madu da ai Idlib ngu ai ginwang hpe bai lu hkra Russia mungdan hpyen hpung ni a garum ya ai the Syria mungdan asuya hpyen hpung ni kaw nna dai ginwag hta laja lana majan baw gasat lam ni galaw nga ai rai nga ai. Ndai zawn majan byin nga ai majaw dai ginwang kaw nna Turkey mungdan de hprawng pru wa nga ai tsinyam hkrum masha ni lai was ai Dec shata laman hta marai 500,000 jan rai nga sai hta, ndai 2/3 ya laman hta hprawng pru wa ai masha mung marai mun 9 jan bai rai nga sai re, nga nna Vatican shiga dap kaw nna shana dat nga ai.

Source : Vatican News

#churchnews

#rvakachinservice