Simsa Lam Hte Myit Hkrum Kahkyin Gumdin Lam Mungga Gun Sa Let, Macedonia Mungdan De Wa Sarabyin Sa Du Gawan Lai Wa

N bung pre ai lam ni a lapran myit hkrum gahkyin lam, ngu ai Mungga hpe gun sa let lai wa sai bat lahkawng ya, May shata praw 7 ya shani, Dingdung Macedonia Mungdan Skopje mare de Wa sarabyin Francis du gawan lai wa ai. Ndai gaw nam bat langai lang ngu na, Wa Sarabyin ni hku nna Macedonia Mungdan de sa du gawan ai hkrun lam mung tai wa sai rai nga ai.

Dingdung Macedonia Mungdan hta Kahtawlik Nawku hpung masha ni gaw Mungdan mungchying sha yawng a tsa htam shadang langai mi pyi ndu ai nlaw la ai Nawku hpung kaji sha rai nga ai majaw, Wa Sarabyin a ya na zawn sa du gawan sa ai lam gaw dai nlaw la ai nawku hpung kaji a matu ahkyak ai labau mabyin tai wa sai rai nga ai. “Sagu hpung kaji e, hkum hkrit e” nga ai ga manoi hte Wa Sarabyin du gawan sa lai wa ai rai nga ai.

Skopje Saradaw Ginwang na hkying lam hte ru ai Nawku hpung masha ni hpe mung, Macedonia Kahtawlik ngu ai hpung masha ni hpe mung, bai Byzantine Nawku htung tara hkan ai hpung masha ni, Albanian, Croats, Poles, Bulgarians hpung masha ni hpe mung woi awn zinlum lam galaw nga ai Macedonia Saradaw Stoyanov a lit magam gaw Nawku hpung a matu grai ahkyik ai lit lamang langai rai nga ai.

Wa Sarabyin Francis hku nna shi a Sarabyin prat hta nlaw la ai sagu hpung masha ni shanu nga ai Mungdan ni de sa du gawn lam ni galaw nga ai rai nga ai. Albania, Turkey hte Sri Lanka Mungdan, bai lai wa sai shata hta sha mung, UAE ngu ai Arab Mungdan hte Moroco Mungdan ni de mung Wa Sarabyin sa du gawan lam galaw lai wa ai.

Dingdung Macedonia Mungdan gaw, Sinpraw Orthodox Nawku hpung, Methodist Nawku hpung, Muslim hte Jewish uhpung ni shanu nga ai shara Mungdan rai nga ai hte maren, simsa lam, tara rap ra lam, nbung ai lam ni a lapran simsa ai hte rau jawm shanu nga pra lam ngu ai mungga ni hpe gun sa let Wa Sarabyin sa du gawan lai wa ai lam rai nga ai, nga nna Vatican sahiga dap kaw nna shana dat nga ai.          

Source: Vatican News