Sasana Magam Bungli Hpe Ahkyak Shatai Let Galaw Gun Hpai Sa Nga Ga, Nga Nna PIME Uhpung Hpe Wa Sarabyin Tsun Shadut

20 May 2019 , Vatican

Sharawng awng ai myit, hkyak hkyak shatai galaw ra ai magam bungli ngu ai masa ni hte kabu gara ai shiga hkaw tsun shachyam shabra nga ga nga nna, Pontifical Institute for Foreign Missions ngu ai PIME sasana uhpung hpe Wa Sarabyin Francis tsun shadut lam galaw dat nga ai. 15 lang ngu ai PIME uhpung a hkumra hpawng kaba de, bat langai ya, May 20 shani Wa Sarabyin sa du nna, lahta na zawn tsun dat ai lam rai nga ai.

Wa Sarabyin tsun ai hta, “shawng de gaw sasana galaw ai ngu ai lam hpe religious Jau uhpung ni kaw nna sha galaw lai wa ai, 1850 ning hta dai shaloi na wa sarabyin Pius IX kaw nna ndai PIME jau uhpung hpe, mai gan mungdan ni de sasana galaw na matu ngu ai yaw wshada lam hte hpaw ninghtan lai wa ai rai nga ai.

Ndai PIME uhpung ni gaw religious Jau Ma Ma ni zawn ga sadi masum hkam la ai ni nrai ma ai sha, maigan mungdan ni de pru sa nna sasana galaw na matu tinang a hkum hpe ap nawng da lam galaw ai, jau ni hte yu maya hpung masha ni rai ma ai. Ndai PIME uhpung a labau gaw chyoi pra san seng ai magam bungli hta dan hkung nga ai, PIME uhpung shang lawm masha marai 19 tara sak se ni hku nna tinang a asak hpe ap nawng lai wa masai mung rai nga ai, kabu gara ai shiga hkaw tsun shachyam shabra ai marai myit n gun ngu ai gaw PIME uhpung a tingkyeng atsam nrai, Karai Kasang kaw nna shadut jaw ya ai myit marai she rai nga ai, ngu ai lam hpe mung myit dum ra ga ai, ndai magam bungli hpe galaw sa na matu ung ang hkrit tsang ai lam n mai nga ai, sharawng awng ai myit hte, grai ahkyak shatai galaw gun hpai ra ai sasana magam re ngu ai myit masa rawng ra ai,” nga nna PIME uhpung hpe Wa Sarabyin Francis tsun n gun jaw lai wa ai lam, Vatican shiga dap kaw nna shana dat nga ai.

Source: Vatican News