Sarabyin Shiga ( Pope Message ) 04 March 2022

22 February 2022, 13:56

 (108) Lang Ngu Na “Htawt Sit Nga Hkawm Ai Ni Hte Tsin-Yam Hkrum Yen Hkawm Ai Ni A Nhtoi” Ga Manoi Ga Baw

February 22, bat lahkawng ya shani, Vatican Discastery for Promoting Integral Human Development kawn ndau ai (108) lang ngu na “htawt sit nga hkawm ai ni hte tsin-yam hkrum yen hkawm ai ni a nhtoi a matu ga manoi hpe “Building the Future with Migrants and Refugees”

“Htawt Sit Nga Hkawm Ai Ni, Tsin-Yam Hkrum Yen Hkawm Ai Ni Hte Rau Shawng Lam Hpe Gaw Gap Sa Wa Ga” ngu ai re lam Vatican Shiga Dap kaw nna ndau da ma ai.

Dai nhtoi hpe daining, September a hpang jahtum laban ang ai 25 ya shani, mungkan madang galaw na re lam chye lu ai.

Tinang dum nta, lamu ga, sun wang hpe tawn kau da nna yen hkawm ra ai ni, tsin-yam amyu myu a majaw hprawng yen hkawm ra ai ni gaw matsan mayan rai ma ai rai nna, shanhte a matu akyu hpyi ya na hte shanhte hte seng ai lam ni hpe bawngban daw dan, makawp maga, garum pawn ba sa wa lu na matu yaw shada let 1914 shaning hta masat galaw hpang ai re lam chye lu ai.

Tsin-yam hkrum yen hkawm ai ni hte rau shawng lam gaw sharawt na lam

Vatican kaw na “the Discastery for promoting Integral Human Development” a tsin-yam hkrum htawt sit yen hkawm ra ai ni hte seng nna ndau ai hta, daining gaw, kadai hpe mung n shangam da ai sha, shanhte a shawng lam hpe Karai Kasang a masin hte maren gaw de sa wa na matu rai nga ai.

Gaw gap gaw de ai ngu ai gaw tsin-yam hkrum yen hkawm ra ai ni hte htawt sit nga hkawm ra ai ni hkum nan mung galaw ra ai, gaw gap ra ai bungli lit magam re ai hpe dum sai let dai hpe dam lada ai hku chye na hkawn hkrang nna shakut sa wa na matu mung rai nga ai. Hpa majaw nga yang shanhte hkum nan ndai myit masa hte hkan galaw shatup ai rai yang she anhte a shinggyim bawngring lam awng dang wa na rai nga ai, ngu Wa Sarabyin shanglang da ai.

Shinggyim hku hku hkau matut mahkai lam hta, shinggyim sut masa lam hta, shinggyim htung hking lailen lam hta, wenyi lam yan hta, rawt jat bawng ring ai shinggyim wuhpung wuhpawng ni hte nawku hpung wuhpung wuhpawng ni tai wa hkra yawng shakut shang lawm ra ga ai, ngu Wa Sarabyin a mungga hta tsun shana da ai.

“Htawt Sit Nga Hkawm Ai Ni, Tsin-Yam Hkrum Yen Hkawm Ai Ni Hte Rau Shawng Lam Hpe Gaw Gap Sa Wa Ga” ngu ai ga manoi ga baw hpe sumru dinglik nga let shinggyim matut mahkai lam hku mung, arung arai hte mung, wenyi lam yan hku mung bawng ring lam hpe gaw sharawt sa wa ga. Karai Hpaji lam hku sumru let mung shang lawm gaw sharawt sa wa ga, ngu Wa Sarabyin Francis, hpang jahtum n-gun jaw saw shaga da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-02/theme-for-108th-world-day-of-migrants-and-refugees-announced.html