Sarabyin Shiga ( 22 February 2022 )

Wa Sarabyin: Machyi Masha Ni A Masat Dingsat Nhtoi Lam Bai Shadum Jahprang Ya 

February 9, bat masum ya shani, hpung shawa masha ni hte hkrum shaga ai (at Audience) hta, mungkan madang masat da ai machyi masha ni a nhtoi hpe bai shadum shana ya let machyi masha ni a wenyi lam hte hkum hkrang hkam kaja lam a matu shanhte hpe ni htep ai hku yu lakawn nga ga, ngu Wa Sarabyin saw shaga da nga ai.

Mungkan madang masat da ai machyi masha ni a nhtoi gaw February 11, bat manga ya shani rai nga ai. Ndai masat dingsat nhtoi hpe Wa Sarabyin, San John Paul II masat shagrin da lai wa ai rai nga ai.

Yaw shada ai lam gaw, Karai Kasang a sagu hpung masha ni hpe n-gun jaw na matu, Kahtawlik Nawku Hpung kawn hpaw da ai hkam ja dap ni hpe n-gun jaw na matu, mungkan, mungdan, mungdaw, mare, buga ni hta nga ai shinggyim wuhpung wuhpawng shagu machyi masha ni hpe ni htep ai hku htep lahti rai yu gawn lajang sa wa lu na matu rai nga ai.

Ndai 2022 shaning a matu ga manoi ga baw ginlam gaw, “Nanhte a Kawa Karai Kasang matsan dum chye ai hte maren, nanhte mung matsan chye dum mu,” (Lk 6:36), shawang myit hte yu lakawn ai hkrunlam hta machyi hkam sha nga ai ni a makau, jing jing rai nga mu, ngu ai rai nga ai. (Be merciful, even as your Father is meriful: Standing beside those for those who suffer on a path of charity)

“Tsi tsi shamai shatsai ya na madang n mai byin ai raitim, yu lakawn ai magam hpe gaw galaw shakut ga; n-gun jaw shalan shabran na gaw galoi raitim, gara masa hku raitim, byin mai nga ai; ni htep ai hku nga lawm ai gaw shanhte hpe yu lakawn ai lam rai nga ai,” ngu n-gun jaw da nga ai.

(30) lang ngu na World Day of the Sick, machyi masha ni a masat dingsat nhtoi hpe Peru, Arequipa kaw galaw na matu masat da lai wa sai raitim, kap bra ana Covid 19 a majaw n galaw byin sai re lam chye lu ai.

Masat dingsat Missa Hkungga hpe gaw Vatican, San Peter Basilica (Nawku Htingnu) kaw February 11 ya shani nawng jau lai wa sai lam chye lu ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-02/pope-francis-recalls-world-day-of-the-sick-at-audience.html