San Pra Ai George A Poi Nhtoi Shani Ramma Ni Hpe Wa Sarabyin Rosary Kum Hpa Gaaran Jaw 

Lai wa sai bat lahkawng ya, April shata 23 ya shani gaw, Wa sarabyin Francis a kashin kamun myit rai nga ai, San Pra ai George a poi nhtoi Missa hkungga hpe San Peter Nawku htingnu kaba hta galaw lai wa ai. Missa hkungga hta Milan ginwang up Saradaw hte dai Saradaw ginwang na Ramma ni law law sa lawm lai wa ma ai hte, Ramma ni hpe Wa Sarabyin kaw nna Rosary kumhpa garan jaw lam galaw lai wa ai lam chye lu ai.

Wa Sarabyin garan jaw ai Rosary gaw Chyoi pra ai Buga kaw nna Tsanlun hpun hte galaw ai Rosary re, Lai sai January shata Panama Mungdan hta galaw lai wa ai Mungkan Ramma nhtoi poi kaba shani hta mung Ramma ni law law hpe ndai Tsanlun hpun hte galaw ai Rosary garan jaw lam galaw lai wa sai rai nga ai. Ndai bat lahkawng ya shani Ramma ni hpe garan jaw ai rosary mung 6,000 daram re nga ai.

Ndai law la ai Rosary ni hpe lit la woi awn galaw ai gaw Chyoi pra ai Buga na, Caritas Jerusalem uhpung re, bawng masha ni, hpyen yen tsin yam hkrum masha ni hte matsan mayan masha ni hpe bungle tam jaw ai, shang gum hpraw kaji kajaw lu hkra lajang garum ya ai masing hku nna galaw ai Rosary ni re, nga nna Vaticasn shiga dap kaw nna shana dat nga ai.

Source: Vatican News