Ramma Ni Hte Seng Ai Saradaw Ni A Synod Hkumra Hpawng Kaba Kaw Nna Hpa Lam Ni Hpe Myit Hkrum Ndau Lam Galaw Dat Nga Ma Ai Kun?

Group photo of the participants in the Synod for Youth (Vatican Media)

XV lang ngu na Saradaw ni a synod hkumra hpawng kaba kaw nna laika man 60 rawng ai myit hkrum ndau laika hpe lai wa sai bat kyu ya shani ndau shapraw dat nga ai.

N-dai myit hkrum ndau laika hta daw masum rawng nga ai. Nam bat langai ngu na daw hta ramma ni hta ta tut byin hkrum nga ai mabyin masa lam ni hpe ding lik da nga ai. Jau, Saradaw ni hku nna galaw ra ai magam bungli ni law law hte kaput nga sai majaw ramma ni hpe woi awn zin lum la na matu Jau Saradaw ni nre ai yu maya masha ni hpe shapan shalat la na ra nga sai ngu ai lam hpe yin la da nga ai.

Ramma ni hta ta tut byin hkrum nga ai, roi rip hkrum ai lam, bu htawt nawt hkawm ra ai lam, bai, “throw away culture” ngu ai arung arai ni hpe lang nna loi loi kabai kau ai lai len ni hte seng nna mung ndai daw langai hta tsun madi madun da ai lam galaw da nga ai.

Roi rip hkrum ai lam hte seng nna, ndai zawn re ai lam ni bai kahtap nbyin pru hkra, tau nau shing dang ai lam ni galaw ai hta, ning baw ning la tai wa na ni hpe lata san la ai, shapan shalat ai, aten kaw nna atsawm hpang ra ai, ngu ai lam mung lawm nga ai.

Ramma ni hpe lakawn la ai lam hta music, shing-ni hpaji hte gin sup hpa lam ni hpe asung jashawn jai lang ra ai lam ni hpe mung tsun madin madun da nga ai.Myit hkrum ndau laika a daw lahkawng ngu na hta gaw, ramma ni ngu ai gaw Madu Yesu hkum nan shanu nga ai shara ni rai nga ai ngu ai lam hpe tsun madin madun da nga ai.

Ali ahti rai nna gau ngwi taw nga ai Nawku hpung hpe nnan bai gram ya ai lam galaw ya ai majaw ramma ni hpe chyeju dum ai, Sasana magam ngu ai gaw jet ai grin ai kabu gara lam hpe jaw ya lu ai lam rai nga ai majaw ramma ni galaw shang lawm ra na lam nan rai nga ai, Sasana magam ngu ai hte matut hkrit shawn nga ai lam gaw karai kasang a magam gun na matu shaga la ai lam rai nga ai, kashin gamun hkam la sai ni yawng gaw chyoi pra san seng ai lam hta hkawm sa na matu shaga la hkrum ai ni hkra rai nga ai, ngu ai lam ni hpe tsun madi madun da nga ai.

Nam bat masum ngu na daw hpe gaw “Ramma ni tin tin rawt mat wa masai” ngu ai ga baw shatut da nga ai. Madu Yesu si ai kaw nna bai hkrung rawt wa ai hpe shawng nnan mu chye dat ai Maria Magdalena hpe kasi kamang hku nna madin madun let ramma ni yawng gaw Karai Kasang a masin salum hta rawng nga ai, ngu ai lam hpe mung bai shangang shakang da ya nga ai.    

Ramma ni hte seng ai yak hkak lam ni hpe dinglik mahtai tam ai lam ni ding run matut galaw nna, ramma ni hpe lakawn la ai lam ni galaw na matu mung, Mungkan Mungdan shagu na Saradaw uhpung ni yawng hpe saw lajin dat ai lam galaw da nga ai. “Rau jawm hkam sa na” ngu ai ga si hpe mung law law lang, lang da ai hpe mu mada lu nga ai. “Ngai” ngu ai masa kaw nna “anhte” ngu na masa hte Sasana galaw na ladat masa hpe jahkrat jaw ya ai lam rai nga ai.

 Ramma ni hpe lakawn woi awn la ai lam hta ahkyep alep adaw ahkyen rai nna n shajup la lu hkraw ai mabyin ni hpe lai di kau lu na matu, Mungdan madang ramma ningbaw shapan shalat ai masing masa ni galaw na ra ai, ngu ai lam mung hkumra hpawng hta law law lang tsun lajin pru wa ai lam ni hta na langai mi rai nga ai, ngu ai lam mung shalawm da nga ai.

Hkumra hpawng myit hkrum ndau laika a jahtum hta gaw, Karai Kasang lajang ya ai nbung ai prat masa hpan amyu myu hta hkawm sa nga ga ai raitim, chyoi pra san seng ai lam hta hkawm sa ra ai, ngu ai lam hta anhte yawng wa hkrum nga ga ai. Zingri zingrat hkrum ai lam ni law law a lapran, ndai chyoi pra san ai prat hpe hkawm sa nga lu na matu, Madu Yesu hta sadi dung nga lu na matu, tinang a prat hpe ap nawng shakut nga ai ramma ni law law nga nga ma ai, ngu ai lam hte ndau laika hpe gin chyum dat da nga ai.

 

Source : Vatican News

 

Add new comment

4 + 0 =