Putao Ninghtawn na hpyenyen masha ni buga dum nta de bai wa

Fr.Dr.Peter Hka Awng Tu & Hpyenyen

Wednesday, March 23, 2022

Putao Ninghtawn,Lung Sha Yang Jau ginwang, Sumpyi Yang mare hte N Tsi yang mare kaw nna nam maling kata yak hkak jamjau hkrum let hpyen yin nga ai mung chying sha ni lai wa sai 22.3.2022 ya shani shim lum ai hte tinang buga de bai wa lu sai lam RVA Rawang nsen shapoi dap hku nna chye lu ai.

Ya na zawn rai buga masha ni bai wa lu na matu buga masha ni hpyi shawn ai hte maren Jinghpaw mungdaw hta na Myitkyina Hkristan Kongsi (MCC) kaw nna woi awn let Peace Creation Group (PCG), Wunpawng Amyusha Mung Bawng Rapdaw ni shanglawm let lahkawng maga na seng ang ai ni hpe bawngban jahkrup nna lit la ya ai lam rai nga ai.

Sum Pyi Yang mare kaw gaw htinggaw yawng rai yang 210, mare masha gaw 1,200 daram nga nna Ntsi yang mare kaw gaw htinggaw 46, mare masha 200 jan re lam chye lu ai.

Lai wa sai February 1, bat lahkawng ya shani, PDF hte KIA Shanglawt Dap kawn, Sum Pyi Yang mare hta nga ai, Myanmar Hpyen Dap hpe zing madu la ai hpang, February 3, bat mali ya shani jang, Myanmar Hpyen Dap kawn nbungli hte mare hpe sa gap ya kaw nna matut manoi majan byin wa ai majaw hpyen yen yen hpang wa ai rai nga ai.

Sum Pyi Yang mare gaw Myitkyina a dungdung maga Putao hte Sumpra Bum mare kaba lahkawng matut ai lam ntsa kaw nga ai mare rai nna, Myitkyina mare kaba kaw na deng 170 tsan ai rai nga ai.

Ntsi Yang mare gaw Sum Pyi Yang mare a sinpraw maga de nga ai mare rai nna, dai mare kaw nna deng lahkawng (2) ram tsan ai rai nga ai.

Myanmar Hpyen Dap gaw dai mare lahkawng yan kaw dap jung let nga ma ai majaw majan byin shagu majan tsin-yam hkrum sha lai wa sai mare lahkawng rai nga ai.

2011 shaning, Myanmar Hpyen Hpung hte KIA Shanglawt Hpung lapran gap hkat jahkring myit hkrum da ai ga sadi run mat ai hpang jahkring hkring majan byin lai wa ai majaw majan tsin-yam hkrum sha nga ai mare lahkawng rai nga ai lam Lungsha Yang Ginwang Up lit magam gun lai wa sai Wa Jau Patrick Gawmaw Hkawng Yae tsun ai a marang e chye lu ai.