Panghkak Jau Ginwang, Htang Nya Mare Hta Fransican ( FMM ) Mama Hpung Ni Sasana Galaw Hpang Sai

Panghkak Jau Ginwang, Htang Nya Mare Hta  Fransican ( FMM )Sasana Mama Hpung Ni Sasana Galaw Hpang

Panghkak jau ginwang Htang Nya mare hta Franciscan ( FMM ) Mama hpung ni shawng nnan nga hpang wa sana rai nna (2.25.2022) ya shani Mama ni hpe hkap tau hkalum la ai hte Mama ni nga na shara dum nta wang hpe shaman ap ya ai lam galaw la lu sai.

Dai lamang hta Wa Saradaw Francis Daw Tang ( Myitkyina, hkring sa ), Panghkak ginwang up Wa Jau Paul Lahpai Awng Dang, ningtau jau Wa Jau Luke Hpa Shan Lum, Dingsing Ginwang up Wa Jau Petar Sunday Awng, ningtau jau Wa Jau Joseph Gam Hpang, Prang Hkudung ginwang up Wa Jau Columban Labang Lar Di, Franciscan Mama hpung na seng ang ai Mama kaba ni hte Mama ni, Mai Ja Yang kaw magam gun nga ai San Francis Xavier Mama ni,shara shagu na du sa ai, nawku hpung magam gun ni hte nawku hpung masha ni shang lawm let galaw la lu sai rai nga ai.

Htang Nya mare hta Mama ni sasana galaw na matu saw shaga ai a yaw shada lam hte seng nna Pang Hkak Ginwang Up, Wa Jau Paul Lahpai Awng Dang ndai zawn tsun dan nga ai.

Sasana Mama ni gaw amyu shayi hte seng nna, lam shagu hta, jau ni n lu galaw ai magam ni hpe mung galaw lu ai. Dai majaw Mama ni hpe ndai makau grupyin ni hta sakse hkam shangun mayu ai. Cahtolic Sasana hpaw  hpang ai 100 ning hpring sai rai tim Sasana Mama Hpung ni n nga shi ai ndai Miwa mung jarit mare hta nga nna Miwa mung jarit maga de nga ai masha ni a matu mung akyu pru u ga matu mung yaw shada ai.

Panghkak jau ginwang gaw mi moi na jaw da ai Hkristan makam masham hpe lu la da sai raitim mung, kaja wa makam masham hte seng ai Catholic makam akri hpe buga masha ni law law n chye shi ma ai. Hpung masha ni gaw lani hte lani law jat wa ai, hpung masha ni, Panghkak jau ginwang kaw manga tsa (500) jan nga ai, manam hpung masha ni hpe shalawm ga nga yang hkying hku na mai tsun ai. Ndai shara kaw nna majan je ai majaw law jat wa ai rai nga ai. Grau nna sasana ma ni hpe makam masham shangang ya ra ai hpe mu mada ai. Prat hta hkan nna chye wa ra ai makam masham shangang shakang masa lam ni mung law law nga wa ai. Sasana mama ni gaw ndai lam hte seng nna galaw lu ai hpe mu mada ai majaw Mama  hpung ni hpe sasana galaw na matu jahkrum bawngban lit shatsam ai rai ga ai. Buga kaw Sasana Ma Ma ni nga wa ai a marang e, Ginwang Saradaw, Ginwang Up jau ni yaw shada ai Nawku Hpung sasana magam hpe rau ta gindun let lani hte lani galaw sa wa lu na re ngu mung mu mada ai. Kaja wa sha mung galaw shakut shaja lu na lam grai nga ai, hpung masha ni mung, Sasana ma ma ni hte ta gindun ga, rau jahkrum bawngban rau magam gun hpai ga.

Ya Covid aten hta pru shang hkawm na grai yak ai, dai majaw gaw buga masha ni hte rau nga let sasana magam galaw lu ai re majaw buga masha ni mung tinang atsam dat nna ma ma ni hpe garum shingtau rau magam gun sa wa ga ngu lit shatsam mayu ai.

Nga hpang na Mama gaw marai masum rai na ma ai. Ndai ma ma ni gaw marai mi n chye ai hpe marai mi chye ai, dai majaw gaw hpung masha ni a matu akyu kaba ai. Mare a matu sha mung n re ai, Jau ginwang kata hpung masha ni, miwa mung hkran na hpung masha ni a matu mung rai nga ai lam ginwang up, Wa Jau Paul Lahpai Awng Dang tsun ai.

Dai shani na Mama ni hpe hkap hkalum ai hte Mama jawng hpaw poi lamang hta sa du lawm ai Wa Saradaw Francis Daw Tang ( hkring sa ) kaw nna mung n gun jaw mungga shaga ya sai.

Panghkak jau ginwang gaw latsa ning jan, sasana mama hpung ni n nga lawm ai sha, Jau ni woi awn ai n pu kaw Nawku Hpung masha ni nga lai  wa sai rai nga ai. Ndai zawn rai, jau ni hkrai sha nga nna sasana magam hpe galaw ai shaloi, grau nna sasana ma ni a makam masham lam, hpaji hparat lam, nga sat nga sa lam hpe atsing ayang, gu gu ra ra sharap shara nna sharin achyin lam woi ya ai hta ningra lam, n dep n hkap ai lam law law nga lai wa na sai. Rai tim, ma ma ni gaw dai lam ni hpe, grau nna, myu shayi ni hte ma kaji ni hpe sharin shaga, lam woi makawp maga ai hta ni htep ai hku atsing ayang grau nna lam woi ya lu ai.

Tarahkaw sara/num ni, la hpung ni, nu num hpung ni, ramma ni Sasana ma ni hte ma ma ni gaw ndai lam ni hpe rau ta gindun galaw gun hpai sa wa na matu nawku hpung gaw lit shatsam da ai re ngu Wa Saradaw Francis Daw Tang (hkringsa) kawn  n-gun jaw mungga shaga da nga ai.

Htang Nya Mama jawng hta Mama kaba lit magam gun hpai na rai nga ai Sr. Maria Jangma Hkawn San (FMM) kaw nna Karai Kasang shatsam ai lit magam hpe kabu gara hkap la ai lam hte mare buga kaw nga ai Karai Kasang a kashu kasha ni hte rau sasana magam bungli hpe ta gindun galaw sa wa na lam tsun ai.

Ya na zawn Mama ni a Sasana magam hpang wa ai ndai mare hta lit shatsam ai hpe gabu gara hkap la let magam bungli hpe mung Karai Kasang a lam woi ai hta gun hpai shakut shaja sa wa na. Grau nna gaw makam masham lam hte hpaji lam hpe gaw sharawt sa wa na re lam, shinggyim lailen lam, shinggyim matut mahkai lam ni hta mung shakut sa wa na re lam tsun ai. Wunpawng myusha ni yawng mung Mama ni hte rau ta gindun shakut shaja sa wa nna bawng ring rawt jat galu kaba ngang gring wa na hpe  myit mada ai lam tsun ai.

Dai shani na lamang hta  Franciscan ( FMM ) Mama hpung a dat kasa hku du sa ai Sr. Mary Lu (FMM) kaw nna mung Sasana galaw na matu  Karai Kasang lit shatsam da sai hpe rau jawm shakut na lam tsun ai.

Anhte shinggyim masha ni yawg hpe sasana galaw na matu Karai Kasang lit shatsam da sai rai nga ai hte maren, anhte FMM mama hpung mung Myanmar Mungdan, Manmaw Saradaw ginwang, Miwa ga jarit, Panghkak jau ginwang hta sasana magam hpe shang lawm galaw lu na matu saw shaga lit shatsam ai Ginwang Up Wa Saradaw Raymond Sum Lut Gam, Ginwang Up Jau Fr. Paul Lahpai Awng Dang hte buga hpung masha ni yawng hpe mung Mama hpung a malai grai chyeju dum ai lam tsun ai.

Rau jawm galaw yang n byin ai hpa n nga ai, yawng gaw byin mai na re, Karai Kasang hta myit mang langai hta sha ginlung kahkyin gumdin let magam lam yawng hpe rau jawm gun hpai sa wa ga nga nna mung saw shaga da ai.

Htang Nya mare gaw Miwa Mung jarit, Loi Je hte ni dik ai mare langai rai nga ai majaw sasana majen je na grai ra ahkyak ai mare kahtawng buga mung rai nga ai.

Shiga - Julia Ja Ing