Nsang Awng La Mungkan ‘Light Heavyweight Champion” Ninggang  Kalang Bai Makawp Maga Lu

13 October 2019, Tokyo

Wunpawng Amyu sha, atsam ningtawn Nsang Awng La gaw 2019 October 13 ya shani, Japan Mungdan, Tokyo Mare kaba kaw galaw ai One Championship a poi pawng latsa hpring ai ‘One Century’ shingjawng poi hta, shi hpe ningdat ai Mungkan Heavyweight World Champion rai nga ai, Philippines hte American Amyu sha Brandon Vera hpe padang dip awng la n htawm, ‘One Light Heavyweight World Champion’ ninggang hpe kalang bai makawp maga da lu nu ai.

Poi hpang ai hte lahkawng yan shi dang ngai dang htawng hkat nna, second round ngu na numdaw hta Vera gaw Nsang Awng La na machyang hku hte baw kaw  htawng katut ai hpang shi mung machyang hku hte bai kayin htawng dat ai majaw Awng La a kahtan kaw sai ni lwi pru wa ai.

Aten Minutes 3 seconds 23 hta Awng La a lata latup a majaw Brandon Vera galau mat ai hte Awng La kawn shi a atsam grau rawng ai lapai lata hku matut manoi htawng bang dat ai shaloi Vera wa bai nlu ginhtang htawng sai majaw tara agyi wa poi hpe jahkring kau nna Awng La hpe dang kau shangun wu ai.

Nsang Awng La gaw, shi hpe ningdat ai sum poi nnga ai  Heavyweight Champion Vera hpe ya na zawn dang la lu sai majaw, MMA ngu ai gayau gaya rai htawng ginsup ai hpan Mixed Matial Arts shingni shingjawng poi hta Mungkan madang ‘Middle Wieght’ hte ‘Light Heavyweight” Champion hku  matut grin nga nna MMA labau hta ningtawn dik htum ginsup ninghkring langai tai wa sai rai nga ai.

Bai nna, Awng La Gaw Jinghpaw Wunpawng Amyu sha ni hte Myanmar Mungdan masha ni yawng a arawng sadang hpe mung kahtap nna sharawt shatsaw ya lu sai rai nga ai.

Thomas