Nawku Hpung Shiga ( Church News ) 14 May 2020

Title

Swiss Guards ngu ai, Vatican shimlam magam gun ni ga sadi, ga shaka tawn ai nhtoi hpe COVID -19  a majaw htawt sit da ai shiga

COVID – 19 a chyam bra laru gaw hkrit hpa kaba rai nga ai. Vatican shimlam magam gun ni ngu chye na ai Swiss shimlam ni gaw shaning shagu May 6 hta magam gun nnan ni ga shaka tawn ma ai rai nga ai. Daining gaw COVID – 19 a majaw du na ra ai October 4 de htawt sit masat da ai.

Raitim, lai wa sai bat 3 ya shani hta gaw (Sack of Rome) Roma hpe gasat zing la ai shaning ladu hkrum hpe gaw manam nlawm ai sha lamang galaw nga ai sumla hpe internet ntsa kawn madun ndau dat ma sai. Swiss shimlam magam gun ni (1527, May 6) kawn Sanhta Maria of the Pieta nawku htingnu wang hta majan byin ai majaw daining gaw (493) lang ngu na shaning rai sai rai nga ai. Dai lamang ten Vatican wang kata share ninghkring ni a matu masat da ai shara hta nampan shanghkawng ni hpe jahkrat ma ai. De hpang gaw hpyen magam gun ninghkring marai (15) hpe Wa Sarabyin kawn shagrau ai shagrau dasik ni hpe magam gun lit hkam ni kawn shagrau jaw ya ma ai.

Misa Hkungga nawng jau ngut ai hpang Swiss shimlam magam gun ni gaw share ninghkring ni a matu masat da ai dam pa de rawt hkawm sa let hkungga jaw ma ai. Dai shara gaw San Peter hte rau jiwoi jiwa share ninghkring ni a sai hkrat lai wa ai shara rai nga ai. Kaja wa nga yang Swit magam gun ni gaw Vatican shimlam hpe jaw ya nga ai balik ni rai ma ai. Dai wuhpung gaw nlaw htum rai nga ai rai tim, labau hta prat galu htum balik dap mung rai ma ai. Lamang hta Swiss shimlam magam gun ni a lit hkam rai nga ai Christoph Graf kawn mungga shaga ai. Shi a mungga hta (1527) shaning na mabyin lam yan ni hpe sang lang tsun hpaw da ai. Dai majan hpe (Sack of Rome) ngu mying dan hkrung ai labau tai nga ai. Dai gasat majan hta Swit shimlam magam gun (147) gaw dai ten na Wa Sarabyin Clement VII hpe makawp maga let asak sum mat ma ai. Shang gasat ai hpyen gaw n-gun kaba ai Roma hkawhkam rai nga ai. Dai majan hta Wa Sarabyin gaw Vatican ga kata makoi lam hku (Castel Sant’ Angelo) ngu ai lamu kasa dap de koi hprawng lawt lu mat ai. Ndai mabyin gaw Swit shimlam labau hta malap nlu ai labau shang mabyin langai rai nga ai. Mungga ngut ai hpang nampan shanghkawng kaba langai hpe myit dum masat jahkrat shagrau ai. 

Shaning shagu ndai lamang hpe manam ni, malai malawm ni, Swiss mungdan asuya, Switzaland mungdan na Kahtawlic Saradaw kaba hpung daju kawn sadu lawm ai lamang kaba hku galaw nga ai re. Lamang hta Swit shimlam ni a nta masha ni, manang ni, Swiss shimlam magam gun usa ni mung sa du shang lawm ma ai. Shawng na shaning ni hta pinra ntsa shangwi shapraw lam ni, Wa Sarabyin hte hkrum shaga ai lam ni mung nga ai. Dai shani na Misa hkungga hpe gaw Vatican Amu madu Msgr. Luigi Roberto Cona rai nna,  shi a mungga hta Swiss shimlam magam gun ni Madu Yesu hkum hte nan hkrum matut lu u ga! Ya na zawn shaning (500) laman hpaji ladat rawng ai hte magam gun ai shimlam hpung langai hku makawp maga shimlam jaw ai hpung langai hku sha n ga, sak hkrung Madu Hkristu hte mung hkrum gatut lu ai wuhpung hpe mung mu lu u ga! Shanhte gaw shanhte sharawng awng ai shani shagu na magam hpe gun hpai ma ai re. Anhte mung shani shagu Yesu a katsi kamang hpe shawng hkam la let 1527 hpang ahkyak ai aten ni hta anhte a kahpu shimlam magam gun ni a kasi hpe la nna, lani hte lani tinang hkum hpe ap nawng nga ga, nga nna, Wa Sarabyin tsun n gun jaw dat nga ai lam Vativan shiga dap kaw nna shana dat nga ai.

 

 

Ka Lajang ai  - Fr. Patrick Gaw Maw Hkawng Yae

                         Coordinator Of RVA Kachin

                         Myitkyina.

 

Add new comment

5 + 1 =

Please wait while the page is loading

Nawku Hpung Shiga ( Church News ) 14 May 2020 | Radio Veritas Asia

Error

The website encountered an unexpected error. Please try again later.