Nawku Hpung Shiga ( Church News ) 12 November 2019

Bolivia mungdan hta byin nga ai mung masa mang hkang lam hpe simsa ai masa hte mahtai tam la lu hkra galaw na matu Bolivia mungdan saradaw ni tsun shadut dat nga ai shiga

Bolivia mungdan hta byin nga ai mung masa mang hkang lam hpe simsa ai masa hte mahtai tam la lu hkra galaw na matu Bolivia mungdan saradaw ni kaw nna ndau shabra laika ndau shapraw let tsun shadut lam galaw dat nga ai.

Mungdan kata kasu gabrawng n gun madun ning hkap ai lam ni kahtap nna byin byin rai nga ai majaw, gumsan magam Evo Morales lai wa sai laban, November 10 ya shani ting nyang kaw nna yu hkring sa mat wa sai the, mungdan kata kasu gabrawng lam ni matut manoi byin nga ai majaw, ‘me bangra lata poi’ atsawm sha bai galaw sa wa lu na ngu ai yaw shada lam hte mang hkang ni hpe simsa ai masa hte ran hparan lam galaw na matu Bolivia mungdan saradaw ni kaw nna tsun shadut lam galaw dat ai rai nga ai.

Bolivia mungdan saradaw uhpung rap daw kaw nna ndau shapraw dat ai ndau laika hta, “mungdan hta ya byin nga ai lam gaw uhpung langai ngai kaw nna mungdan a up hkang na ahkang aya hpe kashun zing la kau ai masa byin nga ai nrai ngu ai lam hpe Boilivia mungdan mung chying sha ni hte mungkan mungdan ni hpe nam bat langai hku nna chye na shangun mayu ai. Lahkawng ngu na lam gaw matai htang mayu ai myit ni hte jahten shaza lam, adawt kasat lam ni kadai n galaw na matu Bolivia mungdan mung chying sha ni yawng hpe lajin mayu ai, mung chying sha ni a asak hpe makawp maga na lit kaba yawng hta nga nga ai, ngu ai lam hpe chye na shangun mayu ai. Jahten shaza lam ni hpe jahkring kau ga, asak hpe makawp maga ga, mungdan a simsa ai lam hpe matut zing kyen la ga ngu nna Karai kasang a mying ning sang hte lajin dat ga ai” nga nna Bolivia mungdan saradaw ni tsun dat nga ai.

Mungdan a shimlam hpyada uhpung hte hpyen dap hpe mung, mungdan a npawt nhpang gaw da tara hta matsun da ai hte maren  mung chying sha ni the mung chyng sha ni a wang lu wang lang ahkaw ahkang ni hpe makawp maga la lam galaw ya na matu saradaw ni tsun lajin dat nga ai. Jahtum hku nna mung masa party ni yawng shang lawm ai zup hpawng kaba galaw nna ra lata poi ni hpe simsa ai masa galaw sa wa lu hkra jawm shakut na matu mung saradaw ni a ndau laika hta tsun lajin da nga ai.

“Galaw lai wa sai mungdan a ra lata poi mahtai hte seng nna bai dinglik ai lam ni asuya galaw nga ai aten mung chying sha ni myit galu kaba hte naw la yu nga ga, nga nna lai wa sai laban shani hta sha Wa sarabyin Francis stun lajin lam galaw dat ai hpang kade nna yang gum san magam Morales tinyang kaw nna yu hkring sa sai lam ndau dat ai rai nga ai.

Lai wa sai Oct 20 shani galaw lai wa sai mungdan ra lata poi kaba mahtai hte seng nna mang hkang byin pru ai hte, ning hkap n gun madun kasu gabrawng lam ni Bolivia mungdan hta matut manoi byin nga ai rai nga ai, nga nna Vaticasn shiga dap kaw nna shana dat nga ai.                

https://www.vaticannews.va/en/church/news/2019-11/bolivia-bishops-appeal-peaceful-solution-political-crisis.html