Nam San Yang Mare Hta Buga Masha Ni Bai Wa Nga Mai Sai Lam Hte Seng Nna Slg.Hpaula Gam Hpang Hte San Htai

Hpaula Gam Hpang hpe san htai galaw nga yang

Majan a majaw sanit ning daram koi yen da ra mat ai Myitkyina-Manmaw lam na, Nam San Yang Mare Buga masha n kau ni n-dai December shata 19 ya shani kaw nna Mare de bai wa nga lu sai hte maren, Mare kata hta Ginlung Christmas Poi hpe mung 2018 December 28 ya shani , St.Pawlu Kahtawlik  Nawku Jawng Wang kata hta galaw ma ai.Ndai zawn Mare masha ni bai wa nga lu na matu ta tut galaw shakut shang lawm ai Yungwi Ninghkring Kaba Slg.Hpaula Gam Hpang hpe RVA kaw nna san htai galaw da ga ai.

RVA Kachin : Nam San  Yang Mare kaw e , majan byin mat ai hpang masha nnga wa ai, ya htinggaw 17 bai wa nga lu magang sai hte Ginlung Christmas Poi ni hpe mung galaw lu nga sai hpe mu lu ai.Rai yang, n dai Mare kaw na koi yen mat sai masha ni yawng bai mai wa na lam ni mung naw nga ai kun, n dai kaw na mabyin masa lam hte seng nnan san lang dan rit.

Hpaula Gam Hpang :  N-dai Nam San Yang Mare gaw, Jinghpaw Mungkan hta majan sawng dik ai,majan hkam sha dik ai Mare langai re ngu tsun yang n shut na re.N-dai kahtawng hpe anhte Manmaw-Myitkyina laiwa laisa yawng hkra mu mada ai kahtawng mung re.Majan byin ai ten kaw nna katsi katsang rai Mawdaw jahkring jahkra hkring nna shinggan pru na pyi hkrit tsang ra ai shara re.(Kabye bawm ni grai law nga ai hpe tsun mayu ai).Re yang, ndai hpe na na tawn da yang anhte hte n-seng ai zawn re Kahtawng langai byin mat wa ai.Moi gaw n dai mare kaw htinggaw 2000 ram nga nna, mung masha 10000 (mun mi) jan daram nga nna wu wu di di rai nga ai shara re hpe na chye lu ai.Majan byin ai 7 ning ram na mat ai hpang, Mungdan a simsa lam mung galoi lu wa na re n chye, ya ndai hta grau na mat wa jang, anhte Wunpawng Myusha ni a buga ginra ni tat kau, mat kau nam maling ni byin mat wa na re hpe mu mada lu ai.Dai majaw n-dai shara kaw e,anhte a buga bai tai na matu shakut wa ai.Lai  wa sai November shata 11 ya shani kaw nna, ndai Nam San Yang Mare bai de hpang wa lu na matu seng ai Jinghpaw Mung Asuya hte Hpyen Dap ni hpe ngai hku nna ahkaw ahkang hpyi lajin ai laika ka dat ai.November 14 ya shani Hpyen Dap ni ngai hpe shaga nna, Ndai Nam San Yang kaw Mare de mayu ai i ? nga nna san wa ai,shaloi ngai mung de mayu ai ngu tsun dat ai.Shaloi, n-dai Nam San Yang Mare masha jet ai,ndai mare kaw nga lai wa ai ni hpe sha anhte san jet nna hkap la na re, dai majaw, Mare Masha re ai lam hpe madun lu na matu ra ai lam ni hpe ka ya rit nga nna tsun wa ai.Ngai mung mai sai ngu nna, ra ai jahpan ni hpe lawan ai hku ka lajang hta shinggyin yu yang, ndai Htinggaw 17 gaw, moi 2017 ning kaw nna nna kalang mi sa nga ga ai ni re hpe mu lu ai,raitim  2018 ning May shata hta kalang bai gawt jahpu kau hkrum ma ai , dai htinggaw 17 a jahpan jin jin nga taw ai hte maren, seng ai Asuya Rung ေနလုံ၀န္ၾကီး hpe shana rai nna,Jinghpaw Mung Asuya kaw nna ndai December shata hta  htinggaw 17 bai wa nga lu na matu lajang ai lam rai nga mali ai.Dai majaw gaw,ေနလုံ၀န္ၾကီး hte sa hkrum nhtawm anhte hte shakut ya majaw chye ju dum ai.Bai matut nna mung, Ya ndai hkrang hku nna sha bai ka lajang n htawm tang shawn ai lam galaw nna htinggaw 17 sha n-ga , Mare masha yawng bai wa nga lu na matu mung anhte myit mada ai. Seng ang ai de mung dai hku tsun ai.Ya gaw Christmas ladaw mung re majaw, Christmas Poi hpe mung galaw mayu ai ngu tsun ai.Ya wa nga na htinggaw 17 mung Christmas Poi sa let, tinang a htinghput htingra ni hpe bai hkyen shakrin ai lam ni galaw na matu anhte n-gup a ga hte seng ang ai de hpyi lajin dat ai.Dai majaw dai ni Christmas Poi hpe mung wu wu di di galaw lu ai hte Chrsitmas Poi ngut ai shaloi gaw ndai htinggaw 17 ni Nawku Jawng Wang kaw nga ,kaga Myen Sam Buhkda ni mung shan hte a Jawng ni hta shanu rai nna, tinang a n-ta htinggaw ni hpe e jasan jaseng ai lam galaw na matu lajang da ga ai.

RVA Kachin : Dai hku nga yang gaw, kade nna yang moi na zawn Mare Kaba bai byin wa na masa nga ai hku rai nga I ?

Hpaula Gam Hpang :  E..rai nga ai.Dai hku nna yaw shada ga ai.

RVA Kachin : Matut nna tsun mayu ai lam naw nga ai kun ?

Hpaula Gam Hpang :  Ndai hte seng nna,ya gaw Htinggaw 17 hpe sha n pawt nhpang galaw nna, lam waw ai hku re sai.Bai  matut shang wa na ni mung ndai htinggaw 17 hpe maram nga na ma ai ngu shadu ai.N-dai htinggaw  17 Mare kata hta wang lu wang lang,n hkrit ntsang nga lu na matu Hpyen Dap ni mung, lahkawng maga na hkai da ai ,Kabye Bawm ni  yawng shaw sai.Matut nna mung ndai kabye bawm ni hpe shaw shatsai ai lam naw galaw na matu BE dap ni ndai kaw nga ai.Ya lahkawng lang galaw sai.Matut nna ndai bat mi lamang mung Bawm tam ai lam naw galaw na re .Mi tsun ai zawn sha,ndai bawm ni yawng mahkra tsai hkra shaw ka ya na matu n-gun dat let shanhte matut manoi galaw na hpe mung anhte kam ai.Dai ni kaning re ai magam bungli rai tim mung , kalang ta law law rai nna byin wa ai nre,ngut mat ai n re, kachyi sha re ai kaw nna hpang let galaw ai hkrai rai nga.Bai nna Simsa lam mung dai hku sha re kaji kajaw re ai kaw na hpang ai.Ndai kachye sha re ai anhte galaw ai lam hta Karai Kasang lawm nna anhte awng dang wa jang e,  ndai kahtawng sha n-ga kaga hpyen yen koi kau da ai Mare ni mung shi hte shi gau ngwi ngwi tinang a htinghput htingra de bai wa nga lu na re ngu myit mada ai.Ya ndai kachyi mi sha re ai magam bungli kaw nna hpang ga ,yawng mung dai hku shakut shaja na hpe myit mada ai .Bai nna, anhte Jinghpaw Mung kaw ျပန္လည္ထူေထာင္ေရးနဲ႕ေနရာခ်ထားေရး ngu ai hpe lai wa sai majan nnan hpang ai hte hpaw wa sai shadu ai.Raitim daini du hkra bai gaw sharawt ai lam hpa mung lu galaw ai lam nnga ai hpe mu mada ai.Dai hpe anhte grai kaba ai Komiti hku nna galaw da ai re hpe chye lu ai.Anhte KIA/KIO maga de mung dai hpe hpaw ninghtan da ai lam nga na re.Asuya kaw mung ndai Komiti hpe nga na re.Myusha Hpung lakung shagu kaw na ni mung nga na re.Asuya ni mung shakut na re.Raitim ndai kaba law ai ndai magam hpe galaw na matu aten grai la ra ai.Re yang, ndai hpyen yen masha ni hpe shara jahkrat ya na hte bai gaw gap ai lam n lu galaw ai shaning grai na mat wa magang anhte a sai daw sai chyen ni lani hte lani lam shagu hta grai hkrat sum mat wa ai lam ni nga ai.Htinghput htingra, yi sun hkau na,dum su nga, ma kaji ni a shawng lam mahkra grai hpang hkrat mat wa ai hpe mu mada ai.Anhte Kanu Kawa ni , ndai masha ni a lapran hta shan hte jaw ai hpe sha la sha rai nna nga wa yang, ya kaba wa na ma ni nam hpam malu masha hte, kyang lailen hte seng ai lam ni n kaja ai hku byin wa ai.N-dai zawn re ai lam ni gaw Kade a mara rai na ta ? Anhte Kanu Kawa ni hpyen yen shara hta nga galu ai majaw byin wa ai lam ni re ngu mu mada ai.Hpyen Yen ginra htayu lanu lakawn ya nga ai ni hpe mung grai chye ju dum ai.Raitim galu galang shawng lam de na matu myit ga nga jang ,anhte grai sum machyi mat na lam nga ai.Ya ga shadawn kaga Mare Buga langai lahkawng hpe anhte mu mada ai. Mare hkan, tinang madu ni gaw hpyen yen dabang kaw nga taw ai.Ndai ni hta pala langai pi n-ngoi ai Mare hkan na ni mung grai lawm ai. Dai ni Myitkyina Manmaw Nmawk hkan sa nga ai.Bungli galaw n ra,lu lu lu sha lu yup ai.Ndai hpe anhte myitdik nga na kun, Tinang a mare hkan gaw ,kaga lawu ga na jasam masha,ga n hkrum ai  ni chyu sha madu tai let shan hte wa nga ai hpe mu lu ai.Dai hpe yu yang daini ndai Nam San Yang gaw galaw nan galaw hpang ra sai,kaji kajaw kaw nna hpang ga ngu tsun mayu ai.

RVA Kachin : Shara Shagu hkan nga ai Wunpawng Myusha ni hte Hpyen Yen Hpu Nau ni hpe n-gun jaw shatsam ai ga hpe mung tsun ya rit.

Hpaula Gam Hpang :  Mai sa!.Dai ni mali kaja nhtoi zinghka n dai Nam San Yang Mare kaw e,Christmas Poi hpe  masha law law hte wu wu di di rai nna lu galaw ai, masha jahpan hpe yu yang 1000 mi hkawt sa du ai, ndai ni yawng mung  Nam San Yang kaw kaja wa nan Mare bai de hpang sai ngu ai hpe mu la, chye la lu na masai ngu kam ai.Re yang gaw, nta du wa ai shaloi , n dai hpe sung sung li li myit dinglik yu nhtawm,hpawtni hpawtdin anhte shakut ai shaloi yawng ni shang lawm lu hkra,akyu hpyi ai hte mung ,myit masin hte mung garum shakut ya marit ngu nna yawng hpe Merry Christmas ngu shakram dat nngai.

 

Julia N-dawng Ja Ing hku nna san htai galaw ai.

Thomas Mung Hpan

 

Add new comment

2 + 5 =