Myitkyina Sasana a Hka Hku Mung De Hpung Gawan Hkrun Lam Awngdang

Sumpyi Yang Mare na St.Peter Nawku Jawng nnan hpe shaman nga yang
Friday, April 05, 2019

Myitkyina Sasana Sagurem Wa,Wa Saradaw Francis Daw Tang woi awn let, Saradaw Ginwang Na Ginjaw  Hpung Gawan Wuhpung Ni gaw lai wa sai March shata 28-April 2,2019 ya laman Hka hku mung de hpung gawan (Pastoral Visit) hkawm sa lai wa sai rai nga ai.

Hpung gawan hpung ni hta, Myitkyina Saradaw Ginwang Ginjaw Rung Ni Hta Magam Gun Nga ai Ginjaw Mung Bawng Hpung,Tara Hkaw Sara,Num Hpung,La Hpung,Ramma,Hpyen Koi Yen Tsin Yam Lakawn Lanawn Hpung( DERT),Hkamja Bawng Ring Dap( CHAD),Shawa Hpawng Matut Mahkai Shiga Dap (Social-Com) kaw na Dakkasa langai hpra shang lawm nna, RVA Jinghpaw Nsen Shapoi Dap kaw na mung Producer Saranum Julia Ndawng Ja Ing shang lawm let Hka hku mung na shiga madat ni hpe RVA a lam tsun jahpra dan ai , shiga madat ni kaw na ginhtang hpaji jaw ai lam ni hpe galaw lai wa sai.

Hpung gawan wuhpung ni a shawng nnan shani Hka Garan Yang, Su Yang hte Sumprabum Mare na Nawku Hpung masha ni hte sa du hkrum zup lu sai rai nna Wa Saradaw kaw na Nawku Hpung masha ni hpe n-gun jaw Mungga shaga ai, ra ai lam ni matsun madun ai hte Ginjaw Hpung gawan hpung ni kaw nna mung tinang a Wuhpung hta ta tut galaw nga ai lam ni tsun sang lang dan ai, hpung masha ni tang madun mayu ai lam ni hpe madat ya ai lam ni galaw la lu sai.

April shata 29 ya shani , Lung Sha Yang Jau Ginwang, Sumpyi Yang Mare de matut hkawm sa wa ai shaloi mung, Sumtsan na du sa ai poi sa masha ni hte Hpung gawan Uhpung ni hpe Sumpyi yang Mare na Nawku Hpung masha ni kabu gara hkap tau la lai wa ma ai. March shata 30 ya shani galaw ai San Peter Nawku Jawng Ding Shawn Shang Poi hta Wa Saradaw hte Wajau ni hku nna Gawgap la lu sai Nawku Jawng hpe shaman  ai lam ni, Shana de 4:00PM aten chyeju shakawn Manau nau ai hte, shana 7:00 PM aten hta mung, Yungwi Pinra ka hkrang lamang ni galaw let ngwi pyaw kabu gara ai hte Nawku Jawng Dingshawn Poi hpe hkikhkam gai hku wu wu di di galaw la lu sai rai nga ai.

March 31,2019 ya shani Putao de matu gawan hkawm  nna Putao Mare na Hpung Masha ni hte mung hkrum zup hta ga shaga la lu sai , Ginwang up Wajau John Hpungshang Awng Htoi woi awn let, Nawku Hpung masha ni hku nna yungwi pinra ka hkrang ni hte shangwi shapyaw dan lai wa ma ai.

Ndai lang na Hkahku mung de Hpung gawan hkawm ai hta, ‘ anhte ndai Myo Mare hkan na masha ni n-gun mi a lu rai Hkahku Mung na hpung masha ni hpe ya na zawn gawan hkawm let tinang dang di lu ai daram garum shingtau ai lam ni galaw lu ai majaw,Bumga na hpung masha ni grai mau kabu myit dik ai hte  grai awng dang n-gun lu ai lam hpe mu lu ai nga nna Wa Saradaw Francis Daw Tang tsun lai wa ai.

Add new comment

3 + 3 =

Quick Links