Myitkyina Kaw Reparation Mama Ni A (160) Ning Hpring Feast Day Masat Nhtoi Missa Galaw

Reparation Mama Ni A (160) Ning Hpring Feast Day Hte Sin Ai Lamu Kasa Ni A Matu Laksan Akyu Hpyi Ya Ai Masat Nhtoi Missa Galaw

2 October 2019, Shatapru

Reparation Mama ni a (160) ning hpring Feast Day hte Sin ai lamu kasa ni a matu laksan akyu hpyi ya ai nhtoi masat Missa hkungga hpe Myitkyina, Shatapru, San Patrick Nawku Htingnu hta dai ni October shata praw 2 ya jahpawt hkying 6:30AM ten hta galaw lai wa ai.

Masat nhtoi chyeju dum Missa hkungga hpe, Myitkyina sasana sagurem wa, Wa Saradaw Francis Daw Tang, Msgr Wajau Pau Lum Dau hte Jau ni woi awn nawng ya  let Reparation Mama hpung ni, kaga hkan na du sa ai Mama ni hte San Patrick Boarder Jawngnum jawng la ni , Buga hpung masha ni sa du shang lawm ma ai.

Dai ning gaw, ndai Mama hpung ni Myitkyina sasana, Shatapru Jau Ginwang kaw nga let ap nawng magam bungli galaw ai (40) ning hpring ai shani mung rai nga ai hte maren, Mama ni hte Boarder jawng ma ni  kawn mahkawn shakawn ai lam, alak mi chye ju dum ai lam ni hpe mung galaw ma ai.

Wa Saradaw Francis Daw Tang hku nna mung Mungga hte n-gun jaw ai hta,“ dai shani na Madu a kabu gara ai shiga rai nga ai Mahte 18:1-5, 10 hte Nehemiah a laika 2:1-8 kaw rawng ai hte maren, Karai Kasang hpe kaja na kam sham ai, san seng chyoi pra sumnung shingdi rai nna, Lamu kasa ni lam madun sharin shaga ai hte maren sak hkrung hkawm sa nga ai ni gaw, kaja nan myit ngwi myit pyaw simsa ai sak hkrung lam hpe lu la nna, sumsing mungdan de shang lu na lekmat hpe lu la ai ni re lam, majan manghkang nbyin shi ai ten tinang shanu nga ai shara ni hpe tinang nan madu ai shara re ngu masat masa n-galaw da ai re majaw, ya bai wa na ten rai jang sak se madun na lam nmu rai shara shamat kau ai manghkang ni byin nga ai lam, dai majaw gumrawng gumra re ai myit n tawn da ai sha, arawng sadang hpring ai hku nga pra sa wa lu hkra shakut ga” nga nna n-gun mungga htawn tsun lai wa ai.

Shatapru Jau ginwang kaw  na, Reparation Mama Maria Ja Ra tsun ai hta, 

“ Anhte ndai kaw Preparation Mama marai 7 nga ai, langai mi gaw Pre-major Jau Tai tau dakkasu jawng hta galaw garum nga ai lam, Mama ni kawn Boarder ma ni hpe up hkang yu ai lam, Ma shalet jawng hpaw nna ma kaji ni hpe shalat shapan ai lam, Nawku dawjau ai lam hte Nawku jawng hpe woi awn yu ai lam,  Ginwang up Jau ni hte lata hkindun let Hpung a sasana magam lam ni hpe galaw shakut nga ga ai”

nga nna tsun lai wa ai.

Ndai The Sisters of Reparation ngu ai  Mama hpung hpe lai wa sai 1859 ning October 2 ya, sin ai lamu gasa ni a poi nhtoi shani Wajau Charles Salerio hte Mama Carolina Orsenigo kawn Italy Mungdan hta gaw de hpang ai rai nna, Madu Yesu dinghta ga ntsa nga ai ten galaw mat wa ai magam bungli ni hpe hkan galaw ai wuhpung ni, grau nna machyi ai masha ni hpe gawn lajang ai, ramma shayi shadang sha ni hpe shading sharai sharin shaga nna Akyu hpyi ai lam hta n-gun grai dat ai wuhpung ni re ai lam chye lu ai.

Thomas/ Elizabeth