Myithkrum Kahkyin Gumdin Lam Hte Kabu Pyaw Lam Lu Shangun Ai Kawa La Ni A Gawdin Shingjawng Poi

Myitkyina Zone Catholic Kawa La ni a No ( 1 ) lang na Gawdin ginsup shingjawng poi gaw jau ginwang shagu na kawa la ni shada da grau nna hku hkau chye lu sai hte ginsup poi sa yu n gun jaw ai shawa masha ni hpe mung myit pyaw kabu gara ai lam lu la shangun sai rai nga ai.

Gawdin ginsup shingjawng poi Ning Gang kashun ai hpe ( 27 - 8 - 2022 ) ya shana de Edin, San Luka Nawku jawng wang na gawdin ginsup pa hta kabu gara awng dang ai hte galaw ngut kre la lu sai.

2022 ning na Myitkyina Zone Catholic Kawa La Ni a No ( 1 ) lang na  Gawdin ginsup shingjawng ai Ning Gang hpe

Shadau Jau Ginwang Kawa La ni dang la lu sai rai nga ai.

No ( 2 ) hpe gaw Edin Jau Ginwang Kawa La ni

No ( 3 ) hpe gaw PLN Jau Ginwang Kawa La ni lu mat ai.

Shadau jau ginwang Kawa La ni gaw nnan ginsup shingjawng hpang ai ten kaw na sum poi n nga ai sha, ginsup dang mat ai rai nna gawdin ginsup poi sa shingjawng ai hta tsan dik htum ai shara kaw na sa shingjawng lawm ai jau ginwang mung  rai nga ai.

Ya na zawn shadau jau ginwang kawa la ni Champion kumhpa lu mat ai gaw madat mara ai lam a majaw re ngu nna shadau ginwang up Wa Jau La Sam St. Columban FIFA ga san san ai shaloi tsun ai lam chye lu ai. Ginwang up Wa Jau La Sam matut tsun ai hta ndai gawdin ginsup shingjawng poi galaw ai a marang e anhte Shadau jau ginwang na Tara Hkaw Sara ni, num hpung, la hpung, ramma ni yawng gaw jau ginwang kata kahkyin gumdin lam grau nna nga wa ai hpe mu lu ai. Kaji kadun ai jau ginwang raitim mung myit hkrum kahkyin gumdin yang hpa mung mai byin ai ngu ai hpe ndai Champoin kumhpa hte tara sara ni, hpung masha ni hte anhte wa jau ni yawng n gun grai lu ga ai nga nna St. Columban FIFA a ga san hpe htai da ya nga ai.

Edin jau ginwang kawa la ni gaw gawdin ginsup pa hte ni dik htum ai madu bu jau ginwang rai nna, lai wa sai ten na Catholic nawku hpung kawn woi awn galaw ai San Columban Poi masat gawdin ginsup shingjawng poi shagu hta Edin ni Ning Gang kashun madu lu mat ai labau nga ai jau ginwang rai nga ai. No ( 1 ) lang na kawa la ni a shingjawng poi hta mung Ning Gang matut lu hkra Edin Kawa La ni grai shakut lai wa sai hpe mu lu ai.

Kawa la ni ngu ai hta Myitkyina Zone Tara Hkaw Sara ni mung shang lawm ginsup shingjawng lawm sai rai nga ai. Myitkyina Zone Tara Hkaw Sara team hta Wa Jau ni hte Deocan ni mung shang lawm ginsup lawm ai rai nna, shawa masha law law a n gun jaw ai hpe hkam la lu ai team rai nga ai.

Ginsup shingjawng lawm ai Sara ni hte Wa Jau ni, Deacon ni gaw dang ai raitim, sum ai raitim mani sumsai rai kabu gara hte shang lawm ginsup lai wa ai gaw sa yu n gun jaw ai shawa masha ni hpe myit pyaw simsa, kabu gara ai lam hkam sha shangun sai rai nga ai.

Kawa la ni a gawdin ginsup shing jawng poi galaw ai a marang e jau ginwang shagu na kawa la ni shada da grau nna hku hkau chye la lu ai gaw nawku hpung rawt jat galu kaba lam a matu mung akyu amyat kaba langai rai nga ai.

Lai wa sai ten Catholic nawku hpung kawn woi awn nna St. Columban poi masat gawdin ginsup shingjawng poi ni  law law lang galaw lai wa sai raitim  Myitkyina Zone Catholic Kawa La ni a gawdin ginsup shing jawng poi gaw shawng nnan lang hku nna labau shang masat hkrum sai rai nga ai.  

By – Julia Ja Ing