Myit Kaji Garen Ai Ni Hte Gawng Run Nga Ai Ni A Matu Akyu Ya Nga Ga,Nga Wa Sarabyin Tsun

November Akyu Hpyi Yaw Shada Lam: Myit Kaji Garen Ai Ni Hte Gawng Run Nga Ai Ni A Matu Akyu Ya Nga Ga (People Who Suffer from Depression)

  Myit kaji garen nna gawngrun ai ni, shanhte a prat hta nhtoi hpe bai lu la mu ga, shalan shabran garum shingtau lam hpe hkam la lu mu ga akyu hpyi ya nga na matu, Wa Sarabyin Francis saw shaga da ai hpe, Vatican Shiga Dap kaw nna, November 3, bat 3 ya shani ndau da ma ai.

  Ladu lai bungli galaw ra ai ni hte bungli a majaw myit hkri ba lit li nga ai masha law law nga nga ma ai rai nna, shanhte a myit masin hkum hkrang hkam sha pu ba lam ni hkoi wai mat u ga akyu hpyi ya na matu Wa Sarabyin Francis saw shaga da ai rai nga ai.

  Shanhte a matu akyu hpyi ya nga ai hta mungkan madan matut mahkai let akyu hpyi ya nga na hpe Wa Sarabyin tsun shadum da nga ai.

  Daini na prat masa hta hkan nna myit ru myit tsang ai majaw mung, prat hpe myit n lawm, hkrup mara nga ai majaw mung, wenyi lam hta shakut hkawm sa na matu pu ba dum wa ai majaw mung, masha law law shanhte a prat hpe jasum kau ma ai.

  Dai majaw gaw masha shagu tinang makau grupyin hta nga ai ni kaw sa du kawan nna shanhte a myit ru myit yak, shingtai hkam sha lam ni hpe shalan shabran n gun jaw, garum shingtau let myit mada lam hpaw ya ga, ngu Wa Sarabyin Francis saw shaga shadum jahprang da nga ai.

  Shanhte myit hpe tsi tsi ya na matu gaw Yesu Madu a ga rai nga ai, “hkri ba la nna, lit li gun ai ni e, ngai kaw wa marit, ngai nanhte hpe ban sa shangun na made ai,” ngu awn la ai ga hte shanhte hpe garum shingtau ya lu na hpe kam sham mu, ngu mung matut shadum da nga ai.

  “Myit ru myit tsang hkri ba hkrum nga ai ni a matu anhte ni aten shagu akyu hpyi ya let shanhte a ra kadawn ai lam ni hta garum shingtau ya nna shanhte a matu nhtoi tai nga ga,” ngu mung hpaji jaw shadum da nga ai.

  Mungkan masha marai shi (10) kaw nna marai langai (1) gaw myit hkamja lam n nga ma ai. Mungkan masha yawng hta na seng 792, tsa shadang 11% daram gaw myit hkamja lam n lu ai ni rai ma ai. Dai ni hta na tsa shadang 3 hte 4 daram gaw myit hkamja lam grai nan ningra ai ni rai ma ai.

  Shaning shagu sen 7 daram re ai masha ni tinang hkum tinang sat si nga ma ai. Shanhte hta na law malawng gaw asak 15 hte 29 lapran kaw na ni rai ma ai. Chyam bra ana Covid-19 tsin-yam a majaw mung myit hkamja lam n lu ai ni, shawoi na zawn myit hkamja lam bai n lu mat ai ni grau grau law jat wa ai.

 Dai majaw, Wa Sarabyin Francis, anhte yawng shada akyu hpyi, garum shingtau hkat na nga na gaw grai nan ahkyak na re, ngu shadum let shada akyu hpyi garum hkat nga na matu saw shaga da nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice