Mediterranean Pang Lai Grup Yin Mungdan  Bari De Wa Sarabyin Sa Du Na 

Mediterranean pang lai grup yin Mungdan hkan na saradaw ni hte hkrum bawng ban lam galaw na matu ya du wa na Febuary shata hta Italy Mungdan a dingda maga na Bari ngu ai Mare de Wa Sarabyin Francis sa du na re, nga ai. 

January 21 bat lahkawng ya shani Vatican kaw nna ndau shapraw ai shiga hta, Bari mare de Febuary 23 ya jahpawt Wa Sarabyin sa du gawan na re, nga nna ndau shapraw dat nga ai.

Italy Mungdan Kahtawlik Saradaw rap daw kaw nna woi awn let, Mediterranean pang lai grup yin Mungdan hkan na saradaw ni Feb shata 19 ya shani kaw nna 23 ya shani du hkra Bari mare hta zup hpawng kaba galaw na lajang nga ai lam rai nga ai. Ndai zup hpawng hta Mediterranean pang lai grup yin, Europa, Dingdung Africa the Asia Sinpraw ka-ang Mungdan 19 kaw na saradaw ni marai 50 jan sa du shang lawm na myit mada da nga ma ai. Mediterranean pang lai hpe lai rap di nna htawt pru wa lu hkra shakut nga ai bu htawt hkawm masha ni the seng ai lam gaw ndai zup hpawng kaba hta bawng na ahkyak ai ga baw langai rai na re, nga ai.

Bari de Wa Sarabyin du gawn ai aten, saradaw ni a zup hpawng hta Mungga shaga ai lam galaw na zawn, shawa pa hta Missa hkungga nawng ya ai lam mung galaw na re, de a hpang shana maga daw hta Vatican de Wa Sarabyin bai gin htawng wa na rai nga ai.

Ndai Bari mare de lai wa sai 2018 ning hta mung Wa Sarabyin Francis sa du gawan lai wa nna, Asia Sinpraw ka-ang mungdan ni hkan na Hkristian Nawku hpung ning baw ni the hkrum shaga bawng lam galaw ai, Asia Sinpraw ka-ang Mungdan ni hta simsa lam ni nga wa hkra jawm bawng ban lam ni galaw let, akyu jawm hpyi ai lam ni mung galaw lai wa ai yu ai re, nga nna Vatican shiga dap kaw nna shana dat nga ai.

Source : Vatican News