Masha Hpe Dut Sha Nna Lu La Ai Sut Masa Akyu Ara Gaw Gaya Kahpa Kaba Rai Nga Ai Nga Nna Wa Sarabyin Tsun

Wa Sarabyin: Masha Hpe Dut Sha Nna Lu La Ai Sut Masa Akyu Ara Gaw Gaya Kahpa Kaba Rai Nga Ai

February (6) , Laban shani, Wa Sarabyin Francis gaw dut sha hkrum ai masha ni a matu akyu hpyi ya let Talitha Kum kaw nna la sa ai San Josephine Bakhita sumla hpe shaman ai mgam hpe dai shani, San Petre shwa pa hta, “Madu A Lamu Kasa Akyu Hpyi Ga” tsun ngut ai hpang, galaw ai re lam Vatican Shiga Dap kaw nna ndau da ma ai.

February (8), bat lahkawng ya shani hta ‘dut sha hkrum’ masha ni a lam sumru akyu hpyi ya na matu mung masat da ai hte maren mungkan madang galaw sa wa ga ngu saw shaga da ai. Shaw shaga ai hte maren San Pra Ai Josephine Bakhita a poi nhtoi, February 8, ya shani, dut sha hkrum ai ni a matu yawng akyu hpyi ya lai wa saga ai rai nga ai.

San Josephine Bakhita (1869-1947)

San pra ai Josephin Bakhita gaw Sudan kaw shangai ai Italy masha (Italian-Sudanese) rai nna, asak 7/8 dram aten kaw nna mayam yam hkrum ai lang law law nga lai wa ai; sak ram ten hta she Italy kaw Cannosian sasana mama tai wa ai rai nga ai. 2000 shaning hta, anhte Kahtawlik Nawku Hpung kawn, Sudan masha ni hte dut sha hkrum ai masha ni yawng a kamhpa shara San Pra masha ngu masat da hkrum ai rai nga ai.

Dut sha hkrum ai masha ni a matu, Wa Sarabyin hkum nan, akyu hpyi woi awn la ai hta Talitha Kum hte mung dan shagu matut mahkai let dut sha hkrum ai masha ni hpe makawp maga ai wuhpung masha ni law law San Josphine sumla a shawng kaw hpawng de akyu hpyi lawm ma ai. Shanhte hpe Wa Sarabyin Francis, Apostolic Palace na hkuwawt chyinghka kaw nna akyu hpyi shaman ya ai lam chye lu ai.

(8) lang ngu na World Day of Prayer and Awareness Against Human Trafficking, ga manoi gabaw ginlam gaw, “The Power of care. The Power of care. Wemen, the Economy and Traficking in Persons,” “Makawp maga n-gun, makawp maga atsam, myu shayi ni, sut masa lam, masha dut shalai ai hpe makawp maga atsam masha hkum shagu kaw nga ai,” ngu ai rai nga ai.

Lam ntsa anhte mu mada nga ga ai, myu shayi sha law law gaw San Josphine zawn dut sha hkrum ai ni rai ma ai. Shanhte gaw dai dut sha hkrum ai ana kaba hpe hkam sha ra nga ma ai. Lam ntsa matsan mayan rai ma ai hte masha ni e mung manu shadan n hkrum, hkungga ai n hkrum rai nga ma ai. Shanhte gaw mayam hku dut sha hkrum ai ni rai ma ai. Shanhte ni gumhpraw n la wa yang anu kayat zingri hkrum ma ai.

Dai zawn re ai ni hpe anhte a mare buga ni hta mu madu lu ai. Kaja wa byin nga ai ndai mabyin ni hpe sung sung sumru dinglik, hparan sa wa ra saga ai, ngu Wa Sarabyin Francis masa lam hpe tsun dan let anhte hpe shadum da nga ai.

Dut sha hkrum masha ni hte n tara shangun hkrum ai ni a matu ja ja akyu hpyi ya let shanhte hpe hkye mawoi ai magam hta mung shang lawm nga ga, ngu mung Wa Sarabyin Saw shaga da nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice