Malta Mungdan De Wa Sarabyin Sa Du Gawan Na Shiga

Mediterranean panglai kata na zinlawng mungdan rai nga ai Malta mungdan de ya du wa na May shata 31 ya shani hta Wa Sarabyin Francis sa du gawan na re, nga nna Vatican kaw nna ndau shana dat nga ai.

“Malta Mungdan de sa du gawan na matu saw shaga ai Malta Mungdan Gumsan Magam hte Mungdan kata na Kahtawlik Nawku hpung Ningbaw ni a saw shaga lam hpe Wa Sarabyin hkap la nna ya du wa na May shata 31 ya shani hta Malta Mungdan de Wa Sarabyin Francis sa du gawan na re” nga nna Vatican matut mahkai shiga shachyam shabra dap lit hkam Matteo Bruni kaw nna Feb 10 ya shani ndau shana dat nga ai.

Wa Sarabyin a Malta Mungdan hkrun lam a matu ndau shapraw dat ai Logo hkrun lam masat sumla hta, hka leng ni grai hta nga ai pang lai ntsa na sang hpaw li sumla, de a ntsa hta udang maga de sharawt marawng nga ai lata ni hpe mu mada nga ai. Lata ni sharawt marang nga ai sumla a lachyum gaw, lawt lu lam a matu tinang nang a buga ginra ni hpe kau tawn da nna hprawng pru wa ai, jam jau hkrum nga ai hpu nau ni hpe hkap tau la nga ai Hkristian masha ni hpe shaleng ya nga ai lachyum re, sang hpaw li sumla a lachyum gaw moi lai wa sai aten hta ndai Malta zin lawng hta Kasa Pawlu sang hpaw li hten nna jam jau hkrum lai wa yu ai mabyin hpe bai myit dum na matu, dai zawn rai Kasa Pawlu jam jau hkrum nga ai aten Malta zin lawng masha ni Kasa Pawlu the shi a manaw manang ni hpe hkap garum la lai wa ai mabyin ni hpe myit dum na martu re, nga ai.

Malta mungdan de Wa Sarabyin sa du gawan na hkrun lam the seng ai wa Sarabyin a ga manoi gaw, Kasa laika 28:2 hta na “Anhte hpe grai wa matsan dum nna, anhte nlang hte hpe hkap hkalum la mi ai” nga ai ja chyum mungga daw rai nga ai.

Ndai Malta zinlawng mungdan de 1990 ning May shata hta Wa Sarabyin Yawhan Pawlu II sa du gawan lai wa yu ai zawn, 2010 ning April shata hta Wa Sarabyin Benedict XVI mung sa du gawan lai wa yu ai re, ng anna Vaticasn shiga dap kaw nna shana dat nga ai.

Source:Vatican news