Makam Masham Nhtoi Lu La Hpang Ai ( 100 ) Hpring Jubali Chyeju Hpe Hkam La Ga

Manmaw Saradaw ginwang na Sinlum Bum hta makam masham nhtoi lu la hpang ai, sasana shang ( 100 ) ning hpring chyeju shakawn Jubali Poi galaw na matu Nmawk ginwang up, Wa jau Stephen Zaw Min Latt hte Sinlum na nawku hpung masha ni hkyen lajang taw sai rai nga ai.

Sinlum buga gaw Kahtawlik makam masham a matu mung, Wunpawng myusha ni a matu mung mying gumhkawng ai, labau shang shara mung rai nga ai.

Dai re majaw ya aten shara shagu hkan chyambra du taw nga ai Sinlum buga masha ni mung Sasana shang ai ( 100 ) ning hpring Jubali chyeju kumhpa hpe hkam la lu hkra yawng shang lawm ga nga nna Sinlum buga masha langai rai nga ai Maihkat ginwang up, Wa Jau Micheal Lazum Lung Wa hte Sinlum buga de sa du hkawm chyai ai Waimaw ginwang up, Wa jau Lucas Layen Dau Hkawng yan kaw nna buga masha ni hpe myit jasu saw lajin ai lam galaw da nga ai.

Sinlum buga hta maigan jau ni rai nga ai Francis jau ni hte Columban jau ni ruyak jam jau law law a lapran sasana nli tum hpe gat hkai hpang da ya ai majaw ya aten asak hkrung nga ai buga masha ni Makam Masham nhtoi lu la ai ( 100 ) ning hpring Jubali chyeju kumhpa hpe hkam la lu ai re lam chye lu ai.

Shiga - Julia Ja Ing