Machyi Makaw Hkrum Nga Ai Masha Ni Hpe Shawang Tsawra Myit Kaba hte Yu Lakawn Lam Galaw Ga : Wa Sarabyin Francis

“Matsan mayan masha ni hte machyi makaw hkrum ai machyi masha ni hpe shawang tsawra myit kaba the yu lakawn lam galaw ai lam gaw n gun kaba dik ai sasana majen je ai lam langai rai nga ai,” nga nna Wa Sarabyin Francis tsun dat nga ai.

Du wa maw nga ai machyi masha ni a Mungkan masat nhtoi kaba shani a matu lai wa sai bat lahkawng ya shani tsun shaga ai mungga hta, lahta na zawn Wa Sarabyin tsun dat ai lam rai nga ai.

February 11 ya shani galaw na rai nga ai machyi masha ni a mungkan masat nhtoi kaba a matu Wa Sarabyin a mungga hpe Jan praw 8 ya shani ndau shapraw dat ai lam rai nga ai. Wa sarabyin mungga hpe Mahte 10:8 hta na, “Jahpu ya ai sha nanhte lu la mu ai rai nna, jahpu nhpyi ai sha jaw ya mu” ngu ai ja chyum mungga daw hpe ga baw shatai nna ndau shapraw dat nga ai.

Wa Sarabyin tsun ai hta, “kum hpa ngu ai gaw mu mada lu ai arung arai hpe jaw ya ai ngu ai lam hta grau nna dam lada kaba nga ai, tinang a aten ahkying hpe sharawng shara sak jaw ya ai, kaga masha ni hte hku hkau ganawn mazup mayu ai myit masin the tinang a aten ahkying hpe sharawng shara sak jaw ya ai, ngu ai lam mung lawm nga ai, ndai gaw shinggyim uhpung uhpawng a matu ahkyak ai lam nan rai nga ai. Machyi makaw hkrum nga ai masha ni hpe yu lakawn lam galaw hta kasi la mai ai masha langai gaw Calcutta kaw na Mother Teresa rai nga ai. Langai sha re ai kasi la mai ai magam bungli gaw, tinang a hkum hpe nyet kau nna shinggyim masha yawng hpe makam masham amyu ru sai, htung hkying hpa n gying hka ai sha, yawng hpe tsawra myit madaun ai lam rai nga ai, ngu ai lam hpe Mother Teresa anhte hpe sharin shadum ya nga ai. Mother Teresa a mai kaja ai kasi lam ni gaw dai ni du hkra anhte yawng hpe kabu gara lam ngu ai gaw hpa baw re ngu ai hpe chye na wa hkra shadum sharai ya nga ai zawn, myit mada shara hpe mung jahtoi ya nga ai,” nga nna wa sarabyin tsun dat nga ai .

Source :EWTNNEWS.COM