Ma Kaji Ni Hpe Hkum Shan Roi Rip Lam Hte Seng Nna Zim Rai Nga Shalai Ai Lam Gaw Hkap La Nmai Ai Lam Re, Nga Nna Vatican Tsun

Ma kaji ni roi rip hkrum ai mang hkang lam ni hte seng nna zim rai nga kau ai lam gaw hkap la nmai ai lam nan re, nga nna the Congregation for the Doctrine of the Faith ngu ai Makam masham hte seng ai Nawku Hpung Ginjaw magam dap a amu madu Saradaw kaba Charles J. Scicluna tsun dat nga ai.

“Nawku hpung kata Ma kaji ni hpe makawp maga la lam” ngu ai ga baw hte Febbruary 21 kaw nna 24 ya shani du hkra Vatican hta galaw nga ai Saradaw ni a zup hpawng hte seng nna lai wa sai bat langai ya shani shiga dap ni hpe tsun sang lang dan lam galaw ai hta lahta na zawn Saradaw kaba Scicluna galaw dat ai rai nga ai.

Saradaw kaba Scicluna tsun ai hta, “Nawku hpung kata Ma kaji ni hpe makawp maga la lam ngu ai magam bungle gaw lai wa sai aten ni kaw nna Nawku hpung dingrun galaw nga ai magam bungle rai nga ai, ndai hpawng gaw ndai magam bungle hpe ta tut hkrang shapraw galaw ai lam ni hpe matut sagawn galaw nga lu na matu, masa mahkrun shabyin ya ai hpawng rai nga ai. Saradaw ni hku nna tinang nang a Saradaw ginwang de bai nhtang wa ai aten, ma kaji ni hpe makawp maga la ra ai tinang a lit lamang ni hpe grau su hprang wa let galaw sa wan a magam bungle masing masa ni hpe masing jahkrat la lu na rai nga ma ai.

 Mara kata ma kaji ni roi rip hkrum lam ni nbyin pru hkra ma kaji ni hpe makawp maga la lam galaw ai hta Saradaw ni hku nna nbyin nmai dingrun n gun dat galaw nga ra ga ai. Nawku hpung gaw ma kaji ni matu maji shim ai shara re ngu ai masa byin tai hkra ma kaji ni roi rip hkrum lam mang hkang ni hpe hkrat mahtai jaw lu ai ladat ni hte hparan mahtai tam ai lam ni hpe anhte Saradaw ni galaw ra ga ai.

Mang hkang lam ma hkra hpe ndai zup hpawng 2/3 ya laman yawng hpe ya hparan lu na nrai nga ai raitim, ya ndai zup hpawng kaw nna ndai mang hkang lam hte seng nna galaw sa wa ra ai ahkyak ai lam ni hpe mu mada wa lu na re ngu nna myit mada ga ai” nga nna Saradaw kaba Scicluna tsun dat nga ai.

Shiga dap ni kaw nna san ai ga san ni law law hpe mung htai ya let, ma kaji ni hpe roi rip lam galaw ai mang hkang lam ni hpe zim rai tawn kau ai lai ladat kaw nna pru wa ra na re, hpa majaw nga yang ndai zawn rip rai nga kau ai lam hpe tsep kawp nhkap la mai ai, nga nna Saradaw kaba tsun lai wa ai .

Source :Vatican News