Lit Magam Hte Seng Nna Saradaw Ni Hpe Wa Sarabyin Matsun Ai Lam

Wa Sarabyin: Lit Magam Hte Seng Nna Saradaw Ni Hpe Matsun

  February 15, bat lahkawng ya shani, Apostolic Letter “muto proprio” “Tinang Hkum Nan Galai Shai Mu” ngu ai ga baw ginlam hte, Wa Sarabyin Francis, laika langai shapraw dat nga ai.

  Ndai gaw Saradaw ni hte seng ai “Nawku Hpung A Tara”, Code of Canon Law (CIC) hte the Code of Canons of the Eastern Churches (CCEO) hpe shatsawm jahtuk jat bang la na Tara langai rai nga ai.

  Latin Church ngu ai gaw Latin nawku daw jau htung lai hpe hkan ai Cahtolic Nawku Hpung hpe tsun ai. Eastern Churches ngu ai gaw Latin nawku daw jau htung lai hte loi li shai ai raitim hkap la kam sham ai makam hte sharin shaga lam gaw maren sha re ai Kahawlik Nawku Hpung hpe tsun ai rai nga ai.

  Ndai lit magam hte seng nna Vatican kaw nga ai buga Saradaw ni hte hkrum let matsun da hpang ai re lam chye lu ai.Yaw shada lam gaw Saradaw ni hte hpa-awn (Superiors) ni a lit magam hpe grau dam lada ai hku gun hpai lu na matu re lam chye lu ai. Dai gaw akyu rawng akyu pru nna byin mai ai masa nga ai, lachyum pru akyu pru ai lam ni, bai dai hte seng ai gaw da hkrang ni re lam chye lu ai.

  Dang di gang dep dang galaw gun hpai lu ai lit ni hpe shatsam ai lam rai nga ai. Saradaw Ginwang kata, seng ang ai Saradaw hkum nan dan tawk (direct) daw dan lu na ahkaw ahkang hte seng ai rai nga ai. Dai gaw Nawku Hpung kata sasana magam hta lawan ladan rai nna ta tut hkrang shapraw sa wa lu na matu yaw shada ai re lam chye lu ai.

  Nawku Hpung kata, ginjaw kaw nna daw dan ai lam ni gaw up hkang hkrang tsang madang hpe hkra machyi shangun ai lam n nga ai sha, Sarabyin hkum nan, ginjaw kaw nna sha daw dan ai ahkaw ahkang hpe seng ang ai Saradaw ni hpe dan tawk daw dan lu na ahkaw ahkang jaw na lam hte seng ai re lam chye lu ai.

  Ndai zawn ahkaw ahkang hpe jaw ai gaw galai shatsawm la ai lam rai nna Nawku Hpung kata ginjaw masing hpe grau nna shadan shalen ai mung rai nga ai lam, ndai hte seng nna galai shatsawm ai lam gaw yawng langai sha rai ra ai ngu ai hkrang masa hpe madung n shakut ai sha buga htung lailen masa ni hta hkan nna galai shatsawm mai ai ladat re lam, ndai zawn n bung pre ai masa hta rai ga ai raitim ginlum kahkyin gumdin lam hpe gaw ahkak tawn ga sadi dung ra lam ni hpe Wa Sarabyin sang lang jahpra da nga ai.

  Buga hpung masha ni hte dai buga hta up hkang ai Saradaw ni gaw grau nna ni htep ai hku nga ai rai nna, masa lam amyu myu hpe mung shanhte hkum nan grau lawan dik ai hku masam maram lu ai hte lawan dik daw dan lu na re majaw ndai zawn ahkaw ahkang hte seng ai lit magam hpe karan jaw ai gaw akyu kaba grau na matu madi shagaw karum ya lu na matu yaw shada ai re lam Wa Sarabyin Francis matut tsun da ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice