A Lam Wudang Akyu hpyi Bum Yu Reng Gaw Gap Komiti hpung nnan bai lata dat sai shiga!

Myitkyina Saradaw ginwang, A Lam Wudang Bum Yu Reng Gaw Gap Komiti hpung nnan bai lata ai Ra lahta poi hpe 16 /10/2019 ya shani Myikyina San Columban Nawku jawng wang,Htap masum mungbawng htingnu hta Ra lata poi woi awn Komiti ni kaw nna woi awn galaw lai wa sai re.N dai Ra lahta Poi hta Wa Saradaw Francis Daw Tang, A Lam Wudang Bum lit hkam Wa jau Jame Gawlu La Doi,Tanghpre jau ginwang up Wa Jau Stephen Supma Sut Awng,Myitkyina Tanghpre hte Shatapru Jau ginwang kaw nna Mungbawng,Num hpung La hpung Ramma hpung ni kaw na dat kasa ni marai Mali shi daram sa du shanglawm lai wa sai re.A Lam Wudang Akyu hpyi Bum Yu Reng Gaw Gap Komiti nnan hpe ra lata Me bang ladat hte lata dang dat ai re. Dai hta Myitkyina,Shatapru hte Tanghpre jau ginwang, kata na dat kasa marai (7) hpra lata da ai kaw na jau ginwang (3) kaw nna Mungbawng,Lahpung,Num hpung Ramma hpung ni kaw nna Me bang lata dat ai hta Komiti hpung marai (9) hpe masat shagring dat lu sai re.Ndai lata dat sai Komiti nnan marai (9) gaw -

1. Sara N Hkum La Yau - Ningbaw (Tanghpre),

2. Slg. Lashi Tu Hkawng - ningtau ningbaw (Myikyina),

3. Sara Npawn Mun Awng - amu madu (Tanghpre)

4. Sara Htingnan Naw Ring - ningtau amu madu (Myikyina),

5. Saranum Ji Hkawn -kun hting (Myitkyina)

6. Sara Shingdawng Sut Mai - malawm (Myitkyina),

7. Slg. Nbang Mung Awng - malawm ( Tanghpre),

8. Slg. Lahtaw Zau Awng - malawm (Myitkyina),

9. Slg. Nhtawng Tu Gum Awn malawm (Shatapru) ni rai nga ai. Dai hta Amu madu magam hpe gaw  A Lam Wudang Bum lit hkam Wa jau hte Tanghpre ginwang up Wa jau yan kaw nna laksan lata san dat rai nga ai. Ndai Komiti ni gaw du wa na 2022 ning du hkra A Lam Wudang Bum Yu Reng Gaw Gap ai lam hta A Lam Wudang Bum lit hkam Wa Jau James Gawlu La Doi hte rau magam gun hpai sa wa na rai nga ai.Komiti ningbaw nnan rai nga ai Sara Nhkum La Yau hku nna A Lam Wudang Bum hpe Nawku hpung a gaw malai hku nna hkam la let grau kaja ai hku galaw sa wa na lam hpe ndai zawn tsun dan lai wa sai.Bai nna Wa Saradaw Francis Daw Tang hku nna mung  A Lam Wudang Bum hpe ya na hta grau nna hkrak hkra galaw sa wa na matu ya na zawn hpaji jaw n gun jaw mungga tsun shaga lai wa sai. A Lam Wudang Bum hpe 1983 ning Wa Jau kaba Paul Lasang La kaw nna woi awn gaw gap hpang wa ai rai nna 2005 ning kaw nna gaw Myitkyina Saradaw ginwang madang hku Komiti hpaw hpang let woi awn galaw hpang wa ai rai nga ai.Ya ndai hte nga yang gaw Komiti ladaw mali rai sai lam mung chye lu ai.

By; John Mung Hkrang