Kayah Mungdaw, Demoso, Daw Ngan Kha kaw na “Mary Queen of Peace” Nawku Jawng Hpe Myanmar Hpyen Hpung Ni E Amyawk Laknak Kaba Hte Bai Gap Jahten Ya Ai Shiga

Loikaw Saradaw Ginwang kata, Myanmar Hpyen hpung ni e amyawk laknak kaba hte gap jahten ai masum ngu na Nawku Jawng tai wa sai “Mary Queen of Peace” Nawku Jawng hpe June 6, laban ya shani gap jahten ya ai re lam chye lu ai.

Nawku Jawng n mai jai lang na daram hten run mat ai rai nna, chyinghka ni yawng ngu na daram ga ayai mat ai lam chye lu ai raitim, masha hkala ai lam gaw n nga shi ai lam chye lu ai.

Jau Ginwang na Nawku jawng hpe amyawk hte gap bun ya ai hpe chye ai hte mare masha ni nam de hprawng yen nga ma ai ni gaw yen, jinghku ni a dum nta de hprawng yen ai ni gaw yen rai ma ai lam mung chye lu ai.

Nawku Jawng hte rau mare na dum nta ni mung jahten hkrum ai lam chye lu ai. Pekhon, Jeroblou kaw nga ai Maria Lungpu hpe mung June 6 ya shani hta sha, Myanmar Hpyen Hpung ni kawn amyawk laknak hte gap hkra ya ai lam chye lu ai.

Laiwa sai May 23 ya shana aten hta Kayanthayar mare kaw na “Sacred Heart Church”, Yesu a Saalum Ningsang Nawku Jawng, May 26 ya shana aten hta “St. Joseph Church”, San Yawsep Nawku Jawng ni hpe amawk laknak kaba hte Myanmar Hpyen hpung ni kawn gap jahten lai wa ai hta, Yesu a Salum Ningsang Nawku Jawng kata kaw machyu nga ai hpung masha marai mali si mat sai hte marai matsat gaw hkala kaba hkrum lai wa sai rai nga ai.

Ya na zawn “Mary Queen of Peace” Nawku Jawng hpe Myanmar Hpyen hpung kawn amyawk kaba hte bai gap jahten ya ai gaw Cardinal Charles Bo kawn hpyen hpung ni yawng hpe shawa masha hte seng ai nawku daw jau shara ni hpe n jahten na matu shadum sadi jaw hpyi shawn da ai hpang bai byin ai mung rai nga ai.

Mung shawa masha hte seng ai Makam masham hpung shagu a chyoi pra ai shara, nawku jawng wang ni hta dap shaatai machyu ai lam n galaw na matu hpyen hpung yawng hpe Kayah mungdaw na Jau ni hpyi shawn da ai lam RFA shiga hta shapoi da ya ma ai. Ya du hkra rai yang Myanmar Hpyen Hpung ni laknak hte gap ya ai majaw, Kayah mungdaw hta Nawku Jawng manga hten run mat sai lam chye lu ai.

Hkristan nawku jawng ni sha n re ai, Buddah jawng ni mung lawm ai lam Jau langai tsun da ai ngu mung matut ndau da ma ai.

 Kayah mungdaw nga ai mung shawamasha ni law malawng Kayah myu sha ni rai ma ai. Dai ni hta na law malawng gaw Hkristan ni rai ma ai rai nna, Hkristan hpung masha ni hta Kahtawlik hpung masha law dik htum rai nga ai. Kayah mungdaw hta mung shawa masha 355,000 daram gaw dai buga ginra hta shanu nga pra ai ni rai ma ai.

Kahtawlik Nawku Hpung kawn hpaw da ai Karuna (Caritas) hpung kawn, hpyen ni e gumshen hkrum nga ai masha 300,000 na matu garum ningtum ni tam shalai ya nga ai lam mung chye lu ai.

Myanmar Hpyen Hpung ni gaw shinggyim nau na shada matsan dum lama ai jahten sharun ai lam tai nga ai lam, mungdan kata makam hpung ni shada lapran majan shabyin ai de mung gale shangun ai lam mung masa sawk sagawn ai ni nkau tsun da ma ai.

Lai wa sai bat kru ya shani sha mung, Ayeyarwady Mungdaw hta simlam la Myanmar Hpyen hpung kawn mung shawa masha marai 20 hpe sat kau sai lam mung chye lu ai.

Ya du hkra rai yang mung shawa masha 857, simlam la hpyen hpung ni e sat hkrum sai re lam Assistance Association for Political Prisoners (AAPP) kawn ndau da ma ai.

Mungdan kata Myanmar hpyendap hte ninghkap hpung ni lapran jahkrup bawngban ai lam hpe galaw na matu Association of Southeast Asian Nations (ASEAN) kawn hpyi shawn nna April htum maga de galaw lai wa sai raitim Myanmar Hpyendap kawn ahkyak la hkan shatup ai lam n law la nga ai lam mung chye lu ai.

Myanmar mundang mung masa lam hte seng nna, Misa mungdan kata hta galaw ai bawngban hpawng mung mungdan akyu rawt jat lam grai lanyen ai majaw myit htum ai lam mung tsun da ma ai.

Laban shani hta Wa Sarabyin Francis mung, bat lahkawng ya shani hkying 1:00 PM aten hta Holy Land (Chyoi Pra Buga) hte Myanmar mungdan simsa lam a matu akyu hpyi na matu saw shaga da nga ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-06/myanmar-military-attacks-catholic-church-queen-peace.html