Karai Kasang A Magam Gun Ai Ni Law Htam Wa Na Matu Akyu Jawm Hpyi Ai Mungkan Nhtoi Kaba Shani, Wa Sarabyin Francis Kaw Nna Deacon Marai 19 Hpe Jau Shatai Ya Lai Wa

11 May 2019 ,Vatican

56 lang ngu na, Karai Kasang a magam gun ai ni law htam wa na matu akyu jawm hpyi ai Mungkan nhtoi kaba, Sagu rem wa kaja laban shani, San Peter Nawku htingnu kaba kaw nawng ya ai Missa hkungga hta, Wa Sarabyin Francis Deacon marai 19 hpe jau shatai ya lai wa ai.

Jau aya jaw ya ai Missa hkungga hta Saradaw ni kaw nna jau tai wa na ni hpe shadum ai mungga hpe madung da nna hkaw tsun ai lam Wa Sarabyin  galaw lai wa ai re, nga ai.

Jau nnan ni hpe Wa Sarabyin hkaw tsun ai hta, “daw jau ai hpe hkam la na matu nrai, daw jau na matu du sa ai, mat mat ai sagu ni hpe hkan tam na pru hkawm sa let, dam mat ai sagu ni hpe hkye mawoi la ai kaja ai sagu rem wa a kasi hpe galoi mung myit dum nga ga, ya nanhte magam bungli galaw shachyen na matu shang bang wa ai shara gaw sut hpaga jawm galaw na matu hpaw ninghatn da ai uhpung uhpawng nre ai zawn, htunghkying hte seng ai uhpung uhpawng mung nrai nga ai, Madu Yesu a sasana magam hta shang lawm na matu she rai nga ai,” nga nna Jau nnan ni hpe Wa Sarabyin hkaw tsun lai wa ai.

Mara raw Sacramentu jaw ya ai lam hte seng nna jau nnan ni hpe tsun shadum lam galaw ai hta, Kawa karai kasang tsawra matsan dum lama chye ai zawn Madu Yesu mung anhte yawng hpe tsawra matsan dum lama lam madu jaw ya nga ai madu rai nga ai, dai zawn sha mara raw Sacramentu jaw ya ai, tsawra matsan dum lama ai magam bungli galaw shachyen ai hta, pu ba mat sai ngu ai lam ni galoi nmai nga ai, nga nna mung Jau nnan ni hpe Wa Sarabyin tsun shadum dat nga ai.

Wa Sarabyin a lata hta Jau aya hkawm la sai Jau nnan marai 19 gaw Italy, Haiti, Japan hte Peru mungdan ni hkan na rai ma ai. Marai matsat gaw hte Sons of the Cross ngu ai Jau uhpung kaw nna rai ma ai. Lahkawng gaw Roma Saradaw ginwang na Jau tai dakkasu jawng kaw hapaji sharin hkaja lam galaw lai wa ai yan rai ma ai, kaga marai 8 gaw Redemptoris jau tai dakkasu jawng kaw karai hpaji sharin hkam la lai wa ai ni rai ma ai, nga nna Vatican shiga dap kaw nna shana dat nga ai.

Source:Vatican News