Jinghpaw Wunpawng Chyum Dakkasu ( KTCS ) Jawngma Ni St. Columban Nawku Jawng De Sa Du Hka Ja

Jinghpaw Wunpawng Chyum Dakkasu, Kachin Theological College and Seminary ( KTCS ) Nawng Nang hta hpaji sharin nga ai Chyum jawngma marai ( 63 ) gaw Rev.Dr. Palawng Naw Tawng ( Sharin Sara ) hte Rev. Labya La Nan ( Sharin Sara ) yan woi awn nna ( 12.3.2023 ) ya, laban jahpawt St. Columban Cathedral, Aung Nan, Myitkyina  kaw Missa Hkungga sa lawm let Kahtawlik nawku hpung a makam masham, nawku daw jau lamang hpe sa du hka ja ai lam galaw lai wa ma ai. Dai shani  sa ai ni yawng gaw Bachelor of theology ( B.Th ) lahkawng ning pang kaw na jawngma ni rai nga ai.

Jinghpaw Wunpawng Chyum Dakkasu a lam hpe  chyum jawng kaw  shaning ( 29 ) ning  sharin Sara ( Professor ) magam lit hpe gun hpai taw nga ai Rev.Dr. Palawng Naw Tawng hku nna kadun ai hku shachyen ya ai hta:

Jinghpaw Wunpawng Chyum Dakkasu ( KTCS ) hta e  Karai hpaji hpan hte Mungkan hpaji hpan law law hpe sharin ya nga ai. Karai hpaji hpan hta e tsang ( 10 ) awng sai ni, jan mau langai lu sai ni hpe e Master madang ngut ai hpang, D. Min du hkra sharin ya ai lam galaw nga ai. Maga mi hta gaw mungkan hpaji hpe mung sharin ya ai. Tsang ( 10 ) awng ai ni a matu ( 4 ) ning lung ra ai music major nga ai, ( 4 ) ning lung ra ai English major nga ai, computer science hpe sharin ya ai, business hpe mung sharin ya ai lam ni nga ai.

Shinggan hpaji hpe sharin ya ai a yaw shadaw lam gaw daini anhte Jinghpaw Wunpawng amyu sha ni Karai mungga hte gapyawn nna mungkan hpaji hpe law law lu sharin la na matu yaw shada ai, grau nna ramma ni a matu re ai.  Korea program ngu ai hpe mung sharin ya nga ga ai. Ndai gaw Nawng Nang kaw laning mi lung nna Korea Mungdan de tinang ra ai major hpe matut hka ja ai lam rai nga ai.

Shinggan hpaji maga de gaw nawku hpung n ginhka ai, amyu n ginhka ai, kadai mung mai shang lawm ai, mai sa sharin la ai, ndai gaw hka lup hpung a matu sha nre, myusha ni yawng a matu hpaji langai hku nna hka ja na matu hpaw ninghtan da ai re. Dai ning kaw na gaw kan bau hpaji a matu  ( Vocational Education and Training ) hpe mung bai hpaw jat da ai. Ya ten mung masa yak ai, ana zinli a majaw mung jawng atsawm n lu lung mat ai ni law law nga ai, ndai ni a matu yaw shada nna hpaw jat ai lam re nga nna kadun ai hku shachyen ya ai.

Dai shani Missa Hkungga ngut ai hpang chyum jawng ma ni hku nna shanhte chye mayu ai , san mayu ai lam ni hpe ga san san ai, san htai lamang hpe matut galaw ai. Shanhte san ai ga san ni hpe gaw Myitkyina Saradaw rung a amu madu Fr.Dr. Joseph Gawlu Yung Wa (Chancellor ) kaw nna htai ya ai. Shanhte san ai ga san ni hta Kahtawlik ramma shayi sha ni kaga makam masham hpung de num n mai wa ai nga teng ai kun? Kahtawlik nawku jawng hkan Maria Lungpu ni hpe mu lu ai gaw dai gaw hpa majaw galaw da ai re kun? Bai sanpra ai ni a sumla ni hpe nawku jawng hkan tawn da ai gaw hpa majaw kun? Jau ni kaw mara sa raw kau jang kaja wa mara tsai mat sai re kun? Nawku hpung hta sasana hpe gara hku galaw taw ai re kun? Mama ni nga ai hpe mu ai raitim Missa hkaw woi awn ai shara hta hpa majaw mama ni n lawm ai re kun ngu ai ga san ni hpe san ai lam mu lu ai.

Ga san, ga htai galaw ngut  ai hpang shanhte a mu mada, chye la lu ai lam ni hpe tsun shapraw wa ai hta jawng num langai mi tsun ai gaw   rau sha nawku daw jau lamang shang lawm ai hta wa jau ni hte hpung masha ni gaw alum ala rai hkap tau la ai majaw grai myit pyaw ai, gara hku nawku daw jau ai lam ni hpe atsawm sha mu mada hka ja la lu ai. Bai nna mara raw ai lam hte seng nna mung atsawm chye la lu ai majaw chyeju dum ai lam tsun ai.

Shd. Naw Ja tsun ai gaw  dai ni gaw RC nawku hpung a nawku daw jau ai Missa Hkungga lamang hta rau sha lu shang lawm  let RC ni a lam hpe atsawm sha hka ja la lu ai. Ngai na matu  gaw No ( 1 ) lang re majaw nbung ai hku nna hkam la ai lam law law hpe mu mada hka ja la lu ai. Ndai kaw du ai  shaloi grau nna mara raw hkat ai lam hte seng nna nawku ku ai shaloi shada da hkungga la ra rai nna  mara raw hkat ai hpe madun dan ai arawn alai ni gaw grai tsawm htap ai arawn alai ni re. Bai nna shawng de anhte n chye na da shi ai, chye na shut taw nga ai lam ni hpe mung wa jau hpe san la rai nna ningmu jashut hku nre sha, mahtai kaja ni hpe chye la lu ai majaw chyeju dum ai lam tsun ai.

Rev. Labya La Nan ( Professor ) mung ngai na matu gaw  No ( 1 ) lang Missa Hkungga nawku daw jau lamang hta sa du lawm ai lam rai sai. Dai ni anhte Mungkan Nawku htung hte seng ai lam sa du sharin hka ja la ai lam rai ga ai. Anhte sharin hka ja la lu ai lam ni mung law law rai sai, shinggan kaw na yu ai hte sha rai taw nga ai, ya daini ndai kaw  ta tut wa shang lawm let rau hkrum jahta yu ai ten hta e anhte mi na hkam la taw ai, mu mada taw ai lam ni hta grau nna tang du mat wa ai hte grau nna hkawn hkrang lu ai lam rai nga ai nga nna tsun ai.

KTCS Nawng Nang Chyum dakkasu jawng gaw KBC nawku hpung a matu Jinghpaw Mung hta kaba dik ai jawng rai nga ai hte KBC gaw Jinghpaw Mung hta hpung masha law dik htum nawku hpung mung rai nga ai.

Shiga - Julia Ja Ing