Jawng Hpaw Misa Hte Shagrau Hpawng Galaw

(2021-2022) Ning Na Hpaji Ladaw, Mai Ja Yang kaw jawng lung na jawng ma ni a matu Misa hkungga nawng akyu hpyi ya ai lamang hte 2020 ning hta Tsang (10) awng ai jawng ma ni hpe shagrau ai lamang hpe Mai Ja Yang Muk Lum San Pio Sara ninghtawn hta 12.6.21 bat kru ya shani galaw lu sai lam chye lu ai.

Misa hkungga hpe Ginwang Up Wajau Paul Lahpai Awng Dang hte ningtau Jau Wajau Luka Hpa Shan Lum yan nawng ya nna, Mai Ja Yang Lahta tsang jawng na jawng up galaw lai wa sai Saranum kaba Ga Sha Lu Mai kaw na mung jawngma ni hpe jawng lung ai shaloi hkan sa ra ai lam ni hte hpaji jaw shadum ai ga tsun ya lai wa sai.

Hpawng Lamang hta jawng ma ni marai (300) jan sa du shang lawm nna (2020-2021) hpaji ladaw hta Tsang Shi san poi awng ai jawngma marai (7) hpe shagrau ai lam galaw la lu sai nga nna Teresa Ah Bu shiga jaw shana dat nga ai.