Jau Ni Hpe Ni Ni Htep Htep Lakawn Ga Nga Nna Saradaw Ni Hpe Wa Sarabyin Tsun Dat Nga Ai Shiga

Saradaw Ginwang langai hta, Saradaw hte Jau ni a lapran na matut mahkai ganawn mazum lam ngu ai gaw Saradaw Ginwang langai a matu grai nan ahkyak ai lam rai nga ai, nga nna Italy Mungdan Saradaw ni hpe Wa Sarabyin Francis tsun dat nga ai.

Hkumra hpawng kaba galaw let hpawng nga ai Italy Mungdan ting na Saradaw ni hpe lai wa sai bat langai, May shata 20 ya shana maga daw Mungga sa du shaga ai aten lahta na zawn Wa Sarabyin tsun lai wa ai lam rai nga ai. Italy Mungdan Saradaw ni a hkumra hpawng kaba hpe 2019 May shata 20 ya shani kaw nna 23 ya shani du hkra galaw lai wa ai re nga ai.

Italy Mungdan Saradaw ni hpe Wa Sarabyin tsun ai hta, “lachyen ginghka ai lam ni nnga ai sha tinang a Jau ni hpe matut mahkai kanawn mazum lam galaw na matu Saradaw ni hta lit nga nga ai. Jet ai sagu rem wa ngu ai gaw, tinang a sagu hpung lapran shanu nga ai, myit man lata lachyen ginghka lam n galaw ai sha madat ya chye ai, hkap tau hkalum la chye ai. Tinang hpe shapyaw chye ai, hkalem ga tsun chye ai jau ni hpe chyu sha lakawn la lam galaw mayu ai agung alau hta nmai hkrat bang ga ai. Nau nkung ai, hkrit gaya chye ai, mang hkang shabyin chye ai Jau ni hpe shingdu gayin kau da nna, kaja ai jau ni hpe chyu sha bungli shatsam ai lam ni n galaw ga. Lama ma shut shai lam galaw hkrup ai, mang hkang byin nga ai jau ni hku nna, shanhte a shut shai lam ni a majaw manang Jau ni a n gawn nsawn di ai hpe hkrum ai, manit ai hkrum ai, je yang ai lam ni hpe hkrum ai, dai re majaw dai zawn re ai jau ni hku nna shanhte a Saradaw ni a  n gun jaw, shalan shabran la ra ma ai. Saradaw ginwang shara nkau mi hkan, jau ni hte Saradaw ni a lapran nhkrum nra byin ai lam ni a majaw Sasana magam bungli ni hta n gun yawm lam byin ai, htingnut mat ai lam ni byin ai majaw myit npyaw ai” nga nna Wa Sarabyin Francis tsun dat nga ai.

Nawku hpung kat, shada da myit hkrum gahkyin let, kabu gara ai shiga shachyam shabra ai magam bungli hpe rau jawm gun hpai ra ai lam ni hte seng nna mung, bai, hkungran lam hte seng nna Wa Sarabyin shi matsun jahkrat da ya sai mang hkang hparan lai masa ni hpe mung lawan ladan hkrang shapraw galaw sa na naw ra nga ai, nga nna Italian Saradaw ni hpe Wa Sarabyin tsun shadum dat nga ai lam, Vatican shiga dap kaw nna shana dat nga ai.         

Source : Vatican Media