Iraq Mungdan De Sa Du Gawan Lu Na Myit Mada Ra Sharawng Ai Lam Wa Sarabyin Tsun

10 June 2019, Vatican

Du na 2020 ning hta Iraq Mungdan de sa du gawan lu na myit mada ra sharawng nga ai, nga nna Wa sarabyin Francis tsun shapraw dat nga ai. Lai wa sai bat langai ya shani ROACO ngu ai garum ningtum uhpung magam gun masha ni hte hkrum shaga ai aten Wa Sarabyin tsun dat ai lam rai nga ai.

Wa Sarabyin tsun ai hta, “Iraq Mungdan hte seng nna galoi mung myit hta rawng nga ai, byin lai mat wa sai kasat gala majan lam ni bai kahtap n shabyin ai sha, mungchying mung shawa yawng a mai kaja ai akyu ara a matu lam magup hta magam bungli rau jawm galaw na ra ga ai, makam masha lam hte seng nna mung langai hte langai a lapran ahtu agawng nshabyin na ahkyak nga ai” nga nna ROACO ngu ai uhpung hta magam gun nga ai magam gun masha ni hpe mungga shaga ai hta Wa Sarabyin Francis tsun dat nga ai.

ROACO ngu ai gaw,  ‘Reunion of Aid Agencies for the Oriental Churches.’ Tsinyam hkrum nga ai Hkrisitian hpung masha ni hpe garum ya nga ai garum ningtum uhpung rai nga ai. Sut su ai mungdan ni hkan na garum gumhpraw ni lakawn gahkyin la nna jam jau hkrum nga ai mungdan ni hkan magam gun nga ai Jau Mama ni, Hkristian Nawku hpung ni hpe madi shadaw lam galaw ya nga ai uhpung rai nga ai.

Kasat gala majan ni a majaw tsin yam hkrum nga ai Syria, Ukraine hte Chyoi pra ai Buga ginra ni hte seng nna tsun du wa ai hta, Iraq Mungdan de du na 2020 ning hta Wa Sarabyin shi sa du gawan lu na myit mada ra sharawng nga ai lam Wa Sarabyin Francis tsun shapraw dat ai lam rai nga ai.

Iraq Mungdan hta Kahtawlik hpung masha ni sen 7 daram sha nga ma ai. Lai wa sai shaning ni hkan IS ngu ai Islamist hpyen hpung ni Mungdan a shara law law hpe zing madu la ai aten, ndai nlaw la ai Hkristian hpung masha ni aja awa zingri zingrat hkrum lai wa ma ai. Ndai hpyen hpung ni hkrat sum mat wa ai kaw nna simsa lam bai lu la hpang wa ai rai nga ma ai, Ndai Iraq Mungdan hta Kahtawlik, Orthodox hte kaga hkristian Nawku hpung ni law law mung shanu nga ai, nga nna Vatican shiga dap kaw nna shana dat nga ai.   

Ga gale.Fr.Bernard Dashi Tang Ji   

Source : Vatican News