Hpi Maw Sasana Hkrun Lam

Myitkyina Saradaw ginwang, Kahtawlik sasana Chihpwi jau ginwang a hkawm wa hkawm sa yak hkak dik ai shara, Miwa Mung jarit rai nga ai Hpi Maw Zong na Htang Dung hte Dalan mare hta nawku jawng ningnan gaw gap taw nga sai. 

Htang Dung mare hta gaw Kahtawlik nawku hpung masha hting ( 13 ) sha nga ai rai nna, dai mare hta hpu nau Lisu myusha ni law malawng nga ai hte Ngaw Chang myusha ni nga ai shara rai nga ai. 

Hpi Maw Zone hta shanu nga ai nawku hpung masha ni law malawng gaw Ngaw Chang myusha ni rai nga ma ai. Lai wa sai aten ni hta Miwa Mung hpe machyu shingbyi nna Hkai Nu, Sau Gaw, Nbu si ni dut lu dut sha ai hte buga masha ni kan bau bungli galaw sha nga ma ai rai tim Covid ana zinli byin ai hpang kaw nna Miwa Mung shang ai chyinghka ni pat kau ya ai majaw buga masha ni tam lu tam sha na grai yak hkak ai shara rai nga ai.  Kade yak hkak ai rai tim nawku jawng kaji ginsup kasha hta sha nawku ku ra ai majaw nawku hpung masha ni mai byin ai ladat hte shakut shaja nna Htang Dung kaw Hkristu Hkawhkam Nawku Jawng hte Dalan kaw St. Gabriel Nawku jawng hpe gaw gap taw ai rai nga ai. 

Mawdaw lam n kaja ai majaw hkawm wa hkawm sa na grai yak hkak ai, Miwa Mung jarit lam mung pat da ai re majaw lu sha manu, gun rai manu ni grai manu hpu ai shara, Ngaw Chang myusha ni a daidaw buga rai nga ai.

Shiga - Ja Ing