Gun Rai Manu Rawt Wa Ai Masa Hta Hpyen Yen Masha Ni Hkam Jan Tawt Lai Lu Na Hte Hkru Kat Masing Galaw Sa Na Bawngban Hpawng Galaw

Gunrai manu ni lani hte lani galai shai rawt wa nga ai masa hta hpyen yen masha ni hkam jan tawt lai lu na matu hte tinang lagaw tinang tsap let hkru kat masing ni galaw sa wa lu na matu Danai ginwang up Wa jau Paul Nbau Zau Lat hte Camp Komiti ni woi awn nna Tanai St. Joseph IDP Camp na hpyen yen masha ni hte bawng ban jahkrum ai lam hpe ( 26.8.2022 ) ya shani galaw la lu sai lam chye lu ai.

Bawngban dawdan la lu ai lam ni gaw gun rai manu rawt wa ai hta hkan nna masha ni garum ntum ai hte sha n law sha ai, n hkru sha na re, dai re majaw ladat shaw nna kan bau bungli ni hpe galaw sa na matu dawdan ai.

Hkai lu hkai sha ai kan bau bungli hpe madung tawn nna galaw sa na matu myit hkrum da ai.

Shara gaw tinang a buga, Awng Lawt buga de n kau mi, Danai muklum grup yin hta tinang manu ai, tinang lu tawn ai lamu ga ni hta galaw sha na myit hkrum da ai.

Hkai lu hkai sha kan bau bungli galaw na yak hkak ai ni gaw Muklum mare kata hta e tinang kung kyang ai, tinang lu galaw ai bungli ni hpe bungli lata ai lam n nga ai sha,hpa baw bungli raitim mung, mai kaja ai baw bungli, gumhpraw lu mai ai baw bungli ni hpe tinang kung kyang ai machye machyang hta mahta nna galaw sa hpang wa na, ladat shaw galaw sa na matu myit hkrum bawngban da lu ai.

Garum ntum ai lam ni gaw Mung masa, hpyen masa a majaw dawm mat wa ai raitim mung,  tinang a lagaw lahpan tinang tsap nna yak hkak ai lam ma hkra hpe rau ta gindun let lai di lu na matu ndai bungli masing woi bawng ai re lam Tanai St. Joseph IDP Camp lit hkam Sara Nhpang Naw Tawng tsun ai kaw na chye lu ai. Tanai St. Joseph Rc Camp hta hpyen yen masha yawng ( 600 ) jan nga ai lam chye lu ai.

By - Julia Ja Ing