Greece Mungdan Hta Wa Sarabyin A Lahkawng Ya Ngu Na Nhtoi (second day)

Wa Sarabyin Francis gaw December 5, laban shani, Greece mungdan Lesbos de sa du kawan ai hta, htawt sit nga hkawm ai ni hpe yu karum na matu tsun shadum da nga ai. Dai shara hta Wa Sarabyin Francis hkum nan, lai wa sai manga ning aten hta htawt sit nga hkawm ai ni hpe sa du hkrum lai wa yu sai re lam chye lu ai.

Dai shara kaw du hpawng nga ai ni gaw, kaja wa nga yang, htawk sit nga hkawm ai ni ngu n mai myit la ya ai, shanhte gaw shinggyim masha ni hta na shinggyim masha ni hkrai rai ma ai, ngu Wa sarabyin sang lang da ai.

Laban shani ka-ang daw hta, Athens na Megaron Concert Hall hta Kahtawlik Nawku Hpung masha ni hpe laban Missa Hkungga nawng jau woi la ya sai. “Myit malai lu galai shai ai lam gaw yak hkak jam jau lam ni kaw nna kaja grau ai de htawk sit sa wa lu shangun ai,” ngu Wa Sarabyin Francis mungga hkaw tsun da ai.

Yawhan Baptista gaw Hkristu du sa wa na lam hpe nam maling kata hta lusha gam, matsan jam jau hkam let lam lajang lai wa ai. Shinggyim masha ni myit malai lu nna Karai Kasang hpang de kayin wa na matu mung, Chyoi Pra ai Wenyi a lam woi ya ai hte, shadum sharin shaga lam woi ya ai.

Karai Kasang gaw, shi a, “nihtep ai, matsan dum lama ai, hte si mani ai lam ni hte anhte kaw sa du kawan nga ai, ngu, Yawhan Baptista a mungga hpe lakap let, Wa Sarabyin Francis, mungga hkaw tsun da ai.

Myit malai ai ngu ai gaw sung sung myit aru lam rai nga ai; Karai Kasang gaw galoi mung anga nga ai wa re; Karai Kasang hte rai yang yawng galai shai lu ai, ngu mung mungga htawn da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-12/pope-conversion-helps-us-move-beyond-our-existential-deserts.html

https://www.vaticannews.va/en/pope/news/2021-12/pope-francis-on-lesbos-stop-this-shipwreck-of-civilization.html

https://www.vaticannews.va/en/pope/news/2021-12/editorial-tornielli-pope-francis-greece-lesbos-refugees-rights.html