Du Sa Ai Ladaw Ngu Ai Gaw Makam Masham Hpe Jasan Jaseng Shachyoi Shapra La Na Aten Ahkying Rai Nga Ai, Nga Nna Wa Sarabyin Hkaw Tsun 

Hkristmat ngu ai gaw Hkristmat hpun gara hku kaning rai byin tai wa ai ngu ai lam nrai, Madu Yesu Hkristu shangai chying hkai wa ai lam she rai nga ai, ngu ai lam hpe myit dum ra ga ai, nga nna lai wa sai ndai bat langai ya jahpawt na Missa hkungga mungga hta Wa Sarabyin Francis tsun dat nga ai.

Matut nna Wa Sarabyin hkaw tsun ai hta, “anhte hpe hkye hkrang la na matu Madu Yesu shangai wa ai, ndai lam hpe anhte poi galaw nga ga ai, raitim mung anhte galaw nga ai Hkristmat poi gaw mungkan lai masa san san poi zawn byin chye nga ga ai, Madu Yesu hpe anhte a kun dinghku, anhte galaw nga ai poi a ahkyak kri madung shatai nna dai madu shangai wa ai lam hpe sung sung sumru dinglik akyu hpyi ai lam ni galaw na malai, gat kaba ni hkan sa, pyaw hkawm, arung arai ni mari, kum hpaw kum hpa ni mari, shada kum hpa jaw hkat, re ai lam ni hpe sha galaw rai nna madu Yesu hpe gaw dum pyi ndum rai, malap mali di kau da chye ga ai.

Madu Yesu Bethlehem hta shangai wa ai, du sa ai ladaw ngu ai gaw ndai byin lai wa sai lam hpe bai sum ru dinglik yu nna makam masham hpe shachyoi shapra jasan jaseng la ai lam galaw na aten ahkying rai nga ai.Du sa ladaw gaw dai Madu hte anhte teng sha bai hkrum na re ngu ai anhte a myit mada shara hpe shangang shaking la nna de a matu lajang shachyip ai lam ni galaw na aten mung rai nga ai.

 Lai wa sai shaning 2000 ning jan daram hta Madu Yesu shangai wa ai hpe anhte mi hte chyaw nmu lu, nhkrum lu ga ai, raitim mung shi teng sha bai du sa wa na re, shi bai du sa wa ai shaloi chyawm gaw anhte shi madu hpe teng sha man hkrum, hkrum lu na ga ai, dai shani hta e, nang gara hku kaning rai na a prat hpe sak hkrung nga pra lai wa sai kun? nga nna shi madu san na ra ai. Shi Madu bai du sa wa na hpe naw ala nga ga ai ndai aten laman hta gaw shi madu hpe Chyoi pra ai hkum hta anhte man hkrum hkrun lu nga ga ai” ng nna Wa Sarabyin hkaw tsun lai wa ai.

Source : Vatican News

Add new comment

14 + 2 =