Daw Dan Galaw Ai Magam Lam Shagu, Masing Masa Shagu Hta Shinggyim Ahkaw Ahkang Hpe Nam Bat Langai Shatai Ra Ai, Nga Nna Wa Sarabyin Tsun

Bu htawt hkawm ai masha ni hte Wa Sarabyin /Sumla : Vatican News

Daw dan galaw ai magam lam shagu, masing masa shagu hta shinggyim ahkaw ahkang hpe nam bat langai shatai ra ai, nga nna Shinggyim ahkaw ahkang masat nhtoi kaba shani ndau shapraw ai laika hta Wa Sarabyin Francis tsun dat nga ai.

UN Mungkan rap daw kaw nna myit hkrum ndau shapraw ai Mungkan Mungdan ni yawng hkan sa ra ai shinggyim ahkawng ahkang ga shaka ndau shapraw da tai shaning 70 ning hpring ladu hkrum masat hku nna, Vatican Grogorian Dakkasu kaba hta Mungkan Mungdan law law kaw nna dat kasa ni shang lawm ai shinggyim ahkawng ahkang hte seng ai hpawng kaba galaw nga ai aten ya na zawn Wa Sarabyin Francis a matsun laika pru wa ai rai nga ai.

Wa Sarabyin Francis a laika hta, “dai ni na prat aten hta n-tara ai lam ni hpan mayu myu hku nna matut mu mada nga ai, masha hpe jam jau jaw ai, n gun makru daw kau ya ai, sat kau ai lam ni du hkra shabyin nna akyu amyat lu la na ngu ai lam hpe sha madung da galaw ai sut hpaga lai ladat ni galaw nga ma ai, sut su nga mai ai masha ni law law nga nga ma ai raitim, shinggyim sari hpe n gawn nsawn di kau ya, lu la ang ai npawt nhpawng shinggyim ahkaw ahkang ni hpe  ning dang kau ya, tawt lai kau ya hkrum nga ai lam ni hpe mung mu mada nga ai, amyu ru sai, baw sang, hkap la kam sham ai makam masham lam ni hpe mahta nna lachyen gying hka roi rip hkrum nga ai ni hpe mung myit dum nga nngai, gasat gala majan a majaw shabyin nna tinang a hpaga lam awng dang wa hkra galaw nga ai masha ni a majaw majan tsin yam hkrum sha nga ra ai tsin yam hkrum masha ni hpe mung nmai malap kau nga ga ai.

 N-dai lam ni hpe manga kau lu hkra anhte hkum shagu grau nna Hkristian ni, tinang nang galaw lu ai lam hta hkan nna n-gun dat galaw ra ga ai, jam jau hkrum nga ai hpu nau ni a nni nkri lam ni hpe shayawm shanem kau ya lu hkra tsawra matsan dum lama ai myit madun na matu Kabu gara ai shiga anhte hpe shadut saw shaga nga ai” nga nna Wa Sarabyin Francis tsun dat nga ai lam Vatican shiga dap kaw nna shana dat nga ai.

Source: Vatican News

Add new comment

2 + 3 =