Dai Ni Na Anhte A Prat Hta Myit Mada Shara Gaw Gap Ya Ai Magam Bungli Ngu Ai Gaw Htunghking Ni A Lapran Mahkrai Htan Ya Ai Lam Rai Nga Ai, Nga nna Wa Sarabyin Tsun

Dai ni na anhte a prat hta myit mada shara gaw gap ya ai magam bungli ngu ai gaw htunghking ni a lapran mahkrai htan ya ai lam rai nga ai, nga nna lai wa sai bat masum ya shani, San Peter pa kaba hta hpawng nga ai shawa hpawng kaba hpe Wa Sarabyin Francis tsun lai wa ai.

Lai wa sai bat hta, “Myit mada shara a shangun ma” ngu ai ga baw hte Morocco Mungdan de sa du gawan lai wa ai shi a hkrun lam hte seng nna tsun hti dan lam galaw ai hta, lahta na zawn Wa Sarabyin tsun dat ai lam rai nga ai.

Wa Sarabyin tsun ai hta, “Morocco Mungdan sa du ai ai aten alum ala hkap hkalum la lai wa ai Morroco Hkawhkam Mohammed hpe chyeju dum ai, dai ni na prat myit mada lam a shangun ma hku nna Muslim hpu nau ni hte hkrum shaga bawng ban lam galaw ai hkrun lam hta lahkam ning gam langai bai htawt nawt lu hkra lajang shabyin ya ai Madu Karai hpe grau nna chyeju dum ai” nga nna Wa Sarabyin tsun dat nga ai.

Matut nna Wa Sarabyin tsun ai hta, “Dai ni na anhte a prat aten hta, myit mada shara gaw gap ya ai ngu ai lam gaw, htunghking ni a lapran mahkrai htan ya ai magam bungli rai nga ai. Morocco Mungdan hta mung chyiing sha ni hte mung masa galaw ai masha ni hte hkrum shaga nna ndai magam bungli hpe galaw gun hpai lu ai majaw grai kabu n gun lu ai. Shinggyim sari hpe hkungga manu shadan makawp maga ai, simsa lam tara rap ra lam ni gaw gap ai, Mungkan ga Makau grup yin shingra tara masa hpe makawp maga ai, ngu ai ndai magam bungli ni hta makam masham uhpung ni a lit lamang grai ahkyak nga ai, ngu ai lam hpe Hkawhkam Mohammed tsun shapraw lai wa ai.

Kaga ahkyak ai ga baw langai gaw, bu htawt hkaw masha ni hte seng ai lam rai nga ai. Ndai magam lam hta mung Morocco Mungdan Kahtawlik Nawku hpung kaw nna grai n gun shakut nga ai. Bu htawt hkawm masha ni hku nna shanhte du nga ai shara na, buga masha ni hku nna shanhte hpe masha zawn hkap manu shadan la ai hpe hkrum ai rai yang masha zawn atsawm sha nga pra lu ai, nga nna shanhten hkum nan tsun ma ai, bu htawt hkawm masha ni hkap tau la ra ai, makawp maga la ra ai, pawn ba madi shadaw la ra ai,” ng anna Wa Sarabyin tsun dat nga ai lam Vaticsn shiaga dap kaw nna shana dat nga ai.

Ga gale : Fr.Bernard Dashi Tang Ji

Source:  Vatican News