Covid-19 ana htum mat na matu Hkristan masha yawng Akyu hpyi ai hta shang lawm nga ga nga nna Wa Sarabyin saw shaga da ai shiga

Wa Sarabyin gaw lusha gam ladaw 4 ngu na laban shani na Madu lamu kasa kyu hpyi ai ten, “Coronavirus ana zingli mat htum u ga matu mungkan masha yawng matsan dum ai myit kaba hte si mani ai myit sat lawat bang nna shanglawm kyu hpyi nga ga” nga nna saw shaga da nga ai. matut nna mung “ndai zawn kyu hpyi ai hta myit mang langai sha hta a grin nga ga. Grau nna, Myit kaji myit garan taw ai ni hte ni htep dik ai hta rau nga nga ga ai ngu myit hkam la let akyu ja ja hpyi ya nga ga” nga nna n gun jaw da ai.

Madu a lamu kasa tsun kyu hpyi ngut jang matut tsun n gun jaw ai hta mung Hkristan masha yawng akyu hpyi ai hta jawm pawng nga ga nga nna saw shaga da nga ai. “Ndai zawn yak hkak jam jau ai nhtoi ni hta, mungkan ting chyam bra nga sai Covid 19 hpe shinggyim masha yawng hkrit kajawng nga ai. Sumsing mungdan na Karai Kasang hpang de Hkristan masha yawng arau sha akyu hpyi nsen hpe du lu u ga matu akyu hpyi jahtau nga ga, tang madun saw shaga mayu nngai” nga nna wa sarabyin tsun da nga ai.

Du na ra ai March shata praw 25, laban bat masum ya shani, Madu lamu kasa Nu Maria hpe ga sa shana ai poi nhtoi hta, Nawku hpung shagu na Ningbaw ni, hkristan masha wuhpung wu hpawng shagu na Ningbaw ni yang woi awn nna, Mahkra dang chye ai Karai Kasang hpang de hpyi shawn ai hku Madu Yesu hkum nan sharin ya ai Madu akyu hpyi ga hpe aten  shabung let akyu hpyi ga nga nna mung saw shaga da nga ai. “Dai madu a Lamu Kasa Maria hpe ga sa shana ai nhtoi hta Mungga gaw masha tai wa sai lam hpe bai myit dum nga ga ai re. Madu Karai Kasang gaw shi a Sape ni madu Yesu a bai hkrung rawt ai awng padang hpe myit dum hkyen lajang let myit mang langai sha hta jawm akyu hpyi ai hpe hkap la ya u ga” nga nna Wa Sarabyin akyu hpyi da nga ai.

Bai matut nna, Wa sarabyin ndau da ai lam gaw, du na ra ai march 27, bat 5 ya shani hta San Peter Nawku Htingnu kaba na Sagrato ngu ai shara kaw na akyu hpyi ai lam galaw sa wa na re. “Dai shani na dai aten dai shara kaw akyu hpyi ai hta matut mahkai online lam hku wenyi myit masin jawm pawng let shang lawm ga” nga nna saw shaga da ai lam Vatican shiga dap kaw nna shana dat ma ai.

credit - Vaticannews